काठमाडौं । सर्वोच्च अदालतमा सोमबार बिहानदेखि सुरु भएको सबै न्यायाधीश सहभागी पूर्ण बैठक (फुल कोर्ट) अझै जारी छ। दैनिक पेसी सूची सार्वजनिक भइसके पनि न्यायाधीशहरू इजलासमा नगई बैठकमा सहभागी भइरहेका छन्।
सर्वोच्च अदालत प्रशासनका अनुसार बैठक कम्तीमा खाजा समयसम्म चल्ने सम्भावना छ। बैठक सकिएपछि मात्रै न्यायाधीशहरू नियमित सुनुवाइका लागि इजलासमा जानेछन्।
प्रधानन्यायाधीश डा. मनोजकुमार शर्माले समसामयिक विषयमा छलफल गर्न सोमबार बिहान पूर्ण बैठक बोलाएका हुन्। प्रधानन्यायाधीश शर्मा र न्यायाधीश हरि फुयालबीचको ह्वाट्सएप संवादसहितका विवरण सार्वजनिक भएपछि सर्वोच्च अदालतभित्र यस विषयले चर्चा पाएको थियो।
यसै विषयको पृष्ठभूमिमा राष्ट्रिय स्वतन्त्र पार्टी (रास्वपा) ले पनि न्यायाधीशमाथि महाभियोग प्रस्ताव अघि बढाउनेबारे छलफल गरेको थियो। पार्टीले यससम्बन्धी निर्णय गर्ने जिम्मेवारी संसदीय दललाई दिइसकेको छ।