महामन्त्री प्रदीप पौडेलले नयाँ केन्द्रीय कार्यसमितिको विवरणसँगै विधान संशोधन र महाधिवेशनबाट पारित दस्तावेज पनि बुझाए।
काठमाडौं । नेपाली कांग्रेसले १५औँ महाधिवेशनबाट निर्वाचित सभापति गगनकुमार थापा नेतृत्वको केन्द्रीय कार्यसमितिलाई आधिकारिक अभिलेखमा अद्यावधिक गर्न निर्वाचन आयोगमा निवेदन दिएको छ।
सोमबार कांग्रेस महामन्त्री प्रदीप पौडेलले प्रमुख निर्वाचन आयुक्त मानबहादुर कार्कीको उपस्थितिमा आयोगका सचिव कृष्णप्रसाद काप्रीलाई नयाँ केन्द्रीय कार्यसमितिको विवरण बुझाएका हुन्।
राजनीतिक दलसम्बन्धी ऐनको दफा ५१ अनुसार पार्टीको नेतृत्व र कार्यसमितिमा भएको परिवर्तन अद्यावधिक गर्न आवश्यक कागजात आयोगमा पेस गरिएको कांग्रेसले जनाएको छ।
कार्यसमितिका सदस्यहरूको विवरणसँगै पौडेलले पार्टीको संशोधित विधान, महाधिवेशनबाट पारित राजनीतिक दस्तावेज, समसामयिक राजनीतिक प्रस्ताव तथा महाधिवेशनका अन्य निर्णयसमेत आयोगलाई बुझाएका छन्।
आवश्यक विवरण र दस्तावेज पेस भएसँगै १५औँ महाधिवेशनबाट निर्वाचित नेतृत्वलाई निर्वाचन आयोगको अभिलेखमा अद्यावधिक गर्ने प्रक्रिया अघि बढेको छ।