गएराति भएको दुर्घटनामा सुनसरीको इटहरी नगरपालिका–७ घर भई हाल काठमाडौंको गोकर्णेश्वर नगरपालिका–१ दोबाटो बस्दै आएका ४५ वर्षीय सन्तोष ढुंगानाको मृत्यु भएको हो।
काठमाडौं उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदीका अनुसार बा.प्र. ०२०५८ प ७४०५ नम्बरको मोटरसाइकलले बा.प्र. ०२०६५ प ९१५७ नम्बरको मोटरसाइकललाई ठक्कर दिएको थियो।
दुर्घटनामा गम्भीर घाइते भएका ढुंगानालाई उपचारका लागि अत्तरखेलस्थित नेपाल मेडिकल कलेज पुर्याइएको थियो। उपचारकै क्रममा उनको मृत्यु भएको प्रहरीले जनाएको छ।
दुर्घटनामा सङ्खुवासभा घर भई काठमाडौंको गोकर्णेश्वर बस्दै आएका ५० वर्षीय टीकाराम गुरुङ पनि घाइते भएका छन्। उनको बायाँ कुम, बायाँ खुट्टा र दायाँ हातमा चोट लागेको ट्राफिक प्रहरीले जानकारी दिएको छ।
प्रवक्ता सुवेदीका अनुसार ठक्कर दिने मोटरसाइकलका चालक गोकर्णेश्वरका २४ वर्षीय आशबहादुर तामाङले मादक पदार्थ सेवन गरेर सवारी चलाएको पाइएको छ।