जिल्ला प्रहरी कार्यालय रौतहटका अनुसार गएराति करिब ९ बजेर १५ मिनेटमा पानी ट्यांकी नजिक स्थानीय २८ वर्षीय राकेश यादवमाथि गोली प्रहार भएको हो।
गोली लागेर घाइते भएका यादवलाई तत्काल उद्धार गरी प्रादेशिक अस्पताल गौर पुर्याइएको थियो। त्यहाँ प्रारम्भिक उपचारपछि थप उपचारका लागि उनलाई वीरगञ्जस्थित नेपाल मेडिसिटी बयोधा अस्पताल पठाइएको प्रहरीले जनाएको छ। उनको अवस्था गम्भीर रहेको बताइएको छ।
प्रहरीका अनुसार गोली प्रहारबाट यादवको ढाडमा तीन, दाहिने पाखुरामा एक तथा दुवै खुट्टामा दुई गरी शरीरका विभिन्न भागमा ६ वटा गोलीका छर्रा लागेको छ।
घटनास्थलको अनुसन्धानका क्रममा प्रहरीले ७.६२ एमएम पेस्तोलका तीनवटा खाली खोका फेला पारेको जनाएको छ।
यादवमाथि गोली प्रहार गर्ने व्यक्ति वा समूहको पहिचान हुन सकेको छैन। घटनाको कारणसमेत खुल्न नसकेको प्रहरीले जनाएको छ। घटनामा संलग्न व्यक्तिको खोजी तथा घटनाको थप अनुसन्धान भइरहेको छ।