नेपाली कम्युनिस्ट पार्टीका संयोजक एवं पूर्वप्रधानमन्त्री पुष्पकमल दाहालले प्राकृतिक विपद्लाई अन्तर्राष्ट्रिय परिघटनाका रूपमा लिँदै यसको सामना गर्न विश्वव्यापी अनुभव र विज्ञतालाई केन्द्रित गर्नुपर्नेमा जोड दिए।
बुधवार प्रतिनिधिसभा बैठकलाई सम्बोधन गर्दै संयोजक दाहालले विपद् व्यवस्थापनका लागि जापान र न्युजिल्यान्डजस्ता मुलुकहरूको सफल अभ्यासबाट पाठ सिक्नुपर्ने बताए। उनले रसुवा बाढी राष्ट्रिय वा क्षेत्रीय विषय मात्र नभई अन्तर्राष्ट्रिय ‘फेनोमेना’ भएको उल्लेख गर्दै यसको न्यूनीकरणका लागि अन्तर्राष्ट्रिय अध्ययन र अनुसन्धानको आवश्यकता औँल्याए।
जापानको उदाहरण प्रस्तुत गर्दै उनले भने, ‘जापानमा पटक–पटक भूकम्प र सुनामी जाने गरे पनि उनीहरूले त्यसको सामना प्रभावकारी रूपमा गरिरहेका छन्। त्यहाँ केन्द्रीय, प्रादेशिक र स्थानीय सरकारका साथै बुद्धिजीवी र विज्ञहरूको एउटा स्थायी संयन्त्र निर्माण गरिएको छ। सङ्कट आउनासाथ उक्त संयन्त्र सक्रिय भई राज्यका सम्पूर्ण शक्ति र स्रोतहरू परिचालन हुने गर्दछन्।’
संयोजक दाहालले नेपालले पनि जापान र न्युजिल्यान्डको जस्तै स्थायी संरचना निर्माण गरी माथिदेखि तलसम्मका सबै तहका सरकार र विज्ञहरूलाई एकीकृत गर्नुपर्ने बताए। यस्तो संयन्त्रले सङ्कटको समयमा द्रुत परिचालन र प्रभावकारी व्यवस्थापनमा बल पुर्याउने उनको विश्वास थियो।