करिब चार हजार करोड भारतीय रुपैयाँको लागतमा निर्माण भएको यो चलचित्र भारतीय फिल्म उद्योगकै सबैभन्दा महँगो परियोजनामध्ये एक हो । ठूलो बजेट, चर्चित कलाकार र अत्याधुनिक प्रविधिका कारण चलचित्रले प्रदर्शनअघि नै दर्शकमाझ निकै चर्चा पाएको थियो ।
चलचित्रमा रणबीर कपूरले भगवान् राम, साई पल्लवीले सीता र यशले रावणको भूमिका निर्वाह गरेका छन् । त्यस्तै, रवि दुबे लक्ष्मण, अरुण गोविल दशरथ, रकुल प्रीत शूर्पणखा र लारा दत्ता कैकेयीको भूमिकामा देखिएका छन् । अनुपम खेरले भने जटायुको आवाज दिएका छन् ।
चलचित्रको कथा रावणको जन्म, तपस्या, शक्ति प्राप्ति र लंकामाथिको विजयबाट सुरु हुन्छ । त्यसपछि कथाले अयोध्याको परिवेश समेट्दै रामको जन्मदेखि वनवाससम्मका घटनालाई प्रस्तुत गरेको छ ।
फिल्म समीक्षक आकाश खरेका अनुसार चलचित्रको प्रमुख आकर्षण यसको दृश्य प्रस्तुति र भीएफएक्स हो । लंका, अयोध्या, वनजङ्गल तथा देवता र असुरबीचका युद्ध दृश्यलाई भव्य रूपमा देखाइएको छ । विशेषगरी जटायु र रावणबीचको युद्धलाई चलचित्रको उत्कृष्ट पक्षका रूपमा हेरिएको छ ।
अभिनयका हिसाबले यश र अरुण गोविलको प्रस्तुति बढी प्रभावशाली रहेको समीक्षकहरूको टिप्पणी छ । यशले रावणको शक्ति, अहंकार र व्यक्तित्वलाई प्रभावकारी ढङ्गले उतारेका छन् भने दशरथको भूमिकामा अरुण गोविलको अभिनयले भावनात्मक प्रभाव छाडेको बताइएको छ ।
तर, रामको भूमिकामा रणबीर कपूरको अभिनय भने अपेक्षाअनुसार सशक्त हुन नसकेको समीक्षा गरिएको छ । रामको शालीनता र व्यक्तित्व प्रस्तुत गर्ने प्रयास भए पनि केही दृश्यमा उनको अभिनय स्वाभाविक देखिन नसकेको समीक्षकको भनाइ छ ।
सीताको भूमिकामा साई पल्लवीको अभिनय औसत रहेको र राम–सीताबीचको भावनात्मक सम्बन्धलाई पर्दामा प्रभावकारी रूपमा स्थापित गर्न नसकिएको टिप्पणी गरिएको छ । त्यस्तै, लक्ष्मणको भूमिकामा रवि दुबेको अभिनय र संवादमा पनि कमजोरी औँल्याइएको छ ।
चलचित्रमा पात्रहरूको विकास र भावनात्मक पक्षलाई पर्याप्त महत्त्व नदिइएको समीक्षकहरूको निष्कर्ष छ । विशेषगरी राम र सीताको सम्बन्ध तथा सहायक पात्रहरूको भूमिकालाई थप विस्तार गर्न सकिने उनीहरूको धारणा छ ।
सङ्गीतकार एआर रहमान र हान्स जिमरको पृष्ठभूमि सङ्गीतले पनि दर्शकमा अपेक्षित प्रभाव पार्न नसकेको समीक्षा सार्वजनिक भएका छन् ।
भारतीय सञ्चारमाध्यममा प्रकाशित समीक्षाअनुसार अधिकांशले चलचित्रलाई पाँचमध्ये तीन तारा दिएका छन् । दृश्य प्रभाव, प्रविधि र भव्यताका दृष्टिले चलचित्र आकर्षक रहे पनि कथाको भावनात्मक गहिराइ र पात्रबीचको सम्बन्धमार्फत दर्शकको मन जित्न भने कमजोर देखिएको समीक्षकहरूको मूल्याङ्कन छ ।