हेटौँडा । बागमती प्रदेश सरकारले प्रदेश प्रशासन सेवाअन्तर्गतका १४२ जना वरिष्ठ शाखा अधिकृत तथा शाखा अधिकृतको सरुवा र पदस्थापन गरेको छ। मुख्यमन्त्री तथा मन्त्रिपरिषद्को कार्यालयले सामान्य प्रशासन समूहका सातौँ र आठौँ तहका कर्मचारीलाई एकैपटक नयाँ जिम्मेवारी तोकेको हो।
कार्यालयको कात्तिक १८ गतेको निर्णयअनुसार प्रदेशका विभिन्न मन्त्रालय, निर्देशनालय, आयोग तथा सरकारी कार्यालयमा कार्यरत अधिकृतहरूको सरुवा तथा पदस्थापन गरिएको हो।
नयाँ व्यवस्थाअनुसार अधिकृतहरूलाई प्रदेशका मन्त्रालय र मातहतका निकायसँगै विभिन्न प्रशासनिक तथा स्वायत्त संस्थामा जिम्मेवारी दिइएको छ। मुख्यमन्त्री तथा मन्त्रिपरिषद्को कार्यालयमा प्रशासनिक समन्वय र अनुगमनको कामका लागि पनि कर्मचारी खटाइएको छ।
त्यसैगरी, आन्तरिक मामिला, कानुन तथा सहकारी मन्त्रालयअन्तर्गत शान्ति सुरक्षा, कानुन निर्माण र सहकारी प्रशासनसँग सम्बन्धित जिम्मेवारीका लागि अधिकृतहरू तोकिएका छन्। कृषि, पशुपन्छी, वन तथा वातावरण मन्त्रालयअन्तर्गतका क्षेत्रको व्यवस्थापनका लागि पनि कर्मचारी पदस्थापन गरिएको छ।
प्रदेश लोकसेवा आयोग, बागमती प्रदेश सभा सचिवालय, प्रदेश नीति तथा योजना आयोग, प्रदेश सुशासन केन्द्र र प्रदेश किताबखानालगायत निकायमा समेत अधिकृतहरूलाई नयाँ जिम्मेवारी दिइएको छ।
पदस्थापनको विवरणअनुसार सबैभन्दा धेरै ७९ जना अधिकृत उद्योग, पर्यटन, श्रम तथा रोजगार मन्त्रालय र मातहतका कार्यालयमा खटिएका छन्। सबैभन्दा कम भौतिक पूर्वाधार विकास मन्त्रालयमा एक जना अधिकृतको पदस्थापन भएको छ।