प्रहरीका अनुसार सिरहा नगरपालिका–११, भलुवाहीस्थित चौहर्वा–सिरहा सडकखण्डमा ना.१ घ.५५३ नम्बरको ट्रक र स.९ प.७६५० नम्बरको मोटरसाइकल ठोक्किएका हुन्।
बिहीबार बिहान चौहर्वाबाट सिरहातर्फ जाँदै गरेको विद्युत् प्राधिकरण मधेश प्रदेश प्रादेशिक कार्यालय जनकपुरको ट्रक र सिरहाबाट चौहर्वातर्फ गइरहेको मोटरसाइकलबीच दुर्घटना भएको हो।
दुर्घटनामा मोटरसाइकलमा सवार पहिचान नखुलेका दुई जना पुरुष गम्भीर घाइते भएका थिए। उनीहरूलाई तत्काल उपचारका लागि प्रादेशिक अस्पताल सिरहा पुर्याइएको थियो। तर अस्पतालमा चिकित्सकले दुवैलाई मृत घोषणा गरेका थिए।
दुर्घटनापछि ट्रक चालक फरार भएका छन्। प्रहरीले फरार चालकको खोजी गरिरहेको जनाएको छ। दुर्घटनामा संलग्न दुवै सवारीसाधनलाई कार्यालयमा ल्याउने प्रक्रिया पनि अघि बढाइएको छ।
मृतक दुवै जनाको पहिचान खुलाउने तथा आफन्तको खोजी गर्ने काम भइरहेको प्रहरीले जानकारी दिएको छ।