काठमाडौं । पूर्वप्रधानमन्त्री डा. बाबुराम भट्टराईले राष्ट्रिय स्वतन्त्र पार्टी (रास्वपा) का सभापति रवि लामिछाने र प्रधानमन्त्री बालेन शाहबीच देखिएको भनिएको असमझदारीप्रति चिन्ता व्यक्त गरेका छन्। सत्तारूढ दल र सरकारबीचको मतभिन्नता सार्वजनिक हुन थाल्नु देश र लोकतान्त्रिक व्यवस्थाका लागि राम्रो संकेत नभएको उनको टिप्पणी छ।
पछिल्लो समय रास्वपाको नेतृत्व र सरकारबीच सम्बन्ध चिसिएको तथा विवाद बढेको चर्चा भइरहेका बेला भट्टराईले सामाजिक सञ्जालमार्फत आफ्नो धारणा सार्वजनिक गरेका हुन्।
रवि लामिछाने र बालेन शाहको तस्बिर सार्वजनिक गर्दै उनले सत्तारूढ दलभित्र सरकार र पार्टीबीचको असमझदारी बाहिर आउनु चिन्ताजनक रहेको उल्लेख गरेका छन्।
आफ्नो टिप्पणीमा भट्टराईले नेपालको राजनीतिक इतिहासमा विभिन्न दलभित्र देखिएका गुटगत संघर्ष र विभाजनका घटनासमेत स्मरण गराएका छन्। उनले २००७ सालपछि नेपाली कांग्रेसमा बीपी कोइराला र मातृका कोइरालाबीच देखिएको मतभेद, २०४७ पछि कांग्रेसमा बनेका ७४ र ३६ समूह तथा २०५८ पछिको गिरिजाप्रसाद कोइराला र शेरबहादुर देउवा पक्षबीचको संघर्षलाई उदाहरणका रूपमा प्रस्तुत गरेका छन्।
त्यस्तै, २०५२ पछि नेकपा एमालेभित्र महाकाली सन्धिको समर्थन र विरोधमा देखिएको विवाद तथा २०६४ पछि माओवादीमा संविधान निर्माण र जनविद्रोहको रणनीतिलाई लिएर उत्पन्न भएको अन्तरसंघर्षले मुलुकलाई नोक्सानी पुर्याएको उनको विश्लेषण छ।
इतिहासमा भएका राजनीतिक गल्ती पुनः दोहोरिन सक्ने चेतावनी दिँदै भट्टराईले जेनजी आन्दोलनको पृष्ठभूमिबाट उदाएको युवा नेतृत्वको पार्टी र सरकारले विगतका कमजोरीबाट पाठ सिक्नुपर्ने बताएका छन्।
उनले नयाँ राजनीतिक शक्तिले पुराना दलहरूको विभाजन र आन्तरिक द्वन्द्वको बाटो पछ्याउनुको सट्टा विगतका अनुभवबाट सिकेर देशका लागि नयाँ राजनीतिक इतिहास निर्माण गर्नुपर्ने धारणा राखेका छन्।