राष्ट्र बैंकले तिहार तथा धनतेरसलाई लक्षित गर्दै बिहीबारदेखि सुनचाँदीका असर्फी र मेडालियन बिक्री सुरु गरेको थियो। पहिलो दिन सर्वसाधारण तथा बैंकका कर्मचारीसमेत गरी करिब ४ हजार ५०० वटा सुनका असर्फी बिक्री भएको थियो।
राष्ट्र बैंकले हरेक वर्ष धनतेरसका अवसरमा सुन तथा चाँदीका सिक्का बिक्री गर्दै आएको छ। गत वर्ष सुनको मौज्दात नभएका कारण चाँदीका मेडालियन मात्रै बिक्री गरिएको थियो। यस वर्ष भने केन्द्रीय बैंकले वाणिज्य बैंकहरूबाट ३५ किलो सुन खरिद गरी सुनका असर्फीसमेत बिक्रीमा ल्याएको थियो।
तर, प्रक्रियागत जटिलता र अन्य व्यवस्थापनसम्बन्धी समस्याका कारण बिक्रीयोग्य असर्फीको परिमाण सीमित रहेकाले पहिलो दिनमै मौज्दात सकिएको राष्ट्र बैंकका प्रवक्ता गुरु पौडेलले जानकारी दिए।
बिहीबार राष्ट्र बैंकले एक व्यक्तिलाई बढीमा एकवटा सुनको असर्फी र दुईवटा चाँदीका मेडालियन बिक्री गरेको थियो। सुनको असर्फी २.५ ग्राम र चाँदीको मेडालियन १० ग्राम तौलका छन्।
पहिलो दिन सुनको एउटा असर्फीको मूल्य ६५ हजार ४०० रुपैयाँ र एउटा चाँदीको मेडालियनको मूल्य ३ हजार ८०० रुपैयाँ निर्धारण गरिएको थियो।
शुक्रबार सुनका असर्फी बिक्री नहुने भए पनि चाँदीका मेडालियन भने उपलब्ध हुनेछन्। राष्ट्र बैंकले शुक्रबारका लागि प्रतिमेडालियन ३ हजार ७०० रुपैयाँ मूल्य तोकेको छ।