काठमाडौं, २० कात्तिक । सरकारको कार्यशैलीविरुद्ध प्रमुख प्रतिपक्षी दल नेपाली कांग्रेस खरो रूपमा प्रस्तुत हुने भएको छ। अबदेखि सरकारले गरेका हरेक काम र निर्णयको कांग्रेसले सशक्त प्रतिवाद गर्ने संकेत देखिएको छ।
नेपाली कांग्रेसका सांसदद्वय जनकराज गिरी र योगेश गौचन थकालीले सुनकोशी मरिण आयोजना ठेक्का रद्द र कर्मचारी नियन्त्रणबारे छलफल तथा अनुसन्धानको माग गर्दै लेखा समितिमा निवेदन दिएका छन्।
केही दिनअघि प्रधानमन्त्री कार्यालयले आयोजनाका दुई उच्च अधिकृतलाई नियन्त्रणमा लिएर दुई दिनसम्म केरकार गरेपछि ठेक्का रद्द गरिएको विषय नीतिगत भ्रष्टाचार भएको भन्दै यसबारे छलफल र अनुसन्धान गर्न सांसदद्वय गिरी र गौचनले शुक्रबार लेखा समितिमा निवेदन दिएका हुन्।