काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने छठ पर्व मनाउन जनकपुरधामस्थित गंगासागर जाने भएका छन्।
तिहार, नेपाल संवत् तथा छठ पर्वको अवसरमा शुभकामना सन्देश जारी गर्दै लामिछानेले आफू छठ मनाउन जनकपुरधाम जाने जानकारी दिएका हुन्।
उनले तिहारलाई उज्यालो र उत्साहको पर्व तथा छठलाई आस्था, श्रद्धा र समर्पणको प्रतीकका रूपमा उल्लेख गरेका छन्। यी पर्वले सबैको जीवनमा सुख, शान्ति, समृद्धि र नयाँ आशा ल्याओस् भन्ने कामनासमेत गरेका छन्।
लामिछानेले चाडपर्वले परिवार, समाज र समुदायबीचको प्रेम, सद्भाव, एकता तथा आपसी विश्वासलाई थप मजबुत बनाउँदै विविधताबीचको राष्ट्रिय एकतालाई सुदृढ पार्ने विश्वास व्यक्त गरेका छन्।