काठमाडौँ गोर्खाजसँगको हारपछि आयोजित पत्रकार सम्मेलनमा रोहितले आगामी दुई खेलमा राम्रो प्रदर्शन गर्न सके प्लेअफमा पुग्ने सम्भावना कायमै रहेको बताए। अहिलेको पराजयबाट पाठ सिकेर आगामी खेलमा सुधार गर्न सकिने विश्वास उनले व्यक्त गरे।
किशोर महतो घाइते भएपछि टोलीको खेल योजनामा केही परिवर्तन गर्नुपरेको रोहितले जानकारी दिए। त्यसको प्रभाव पहिलो १० ओभरको बलिङमा परेको उनको भनाइ थियो। खेलको अन्तिम तीन ओभरमा धेरै रन खर्चिए पनि उपलब्ध बलरलाई योजनाअनुसार नै प्रयोग गरिएको उनले स्पष्ट पारे।
१६१ रनको लक्ष्य लुम्बिनीका लागि पूरा गर्न सकिने खालको भए पनि पावरप्लेमा लगातार विकेट गुमाउँदा लक्ष्य पछ्याउन कठिन भएको रोहितले बताए।
उनले टोलीका ब्याटर आसिफ शेख र डार्सी सर्टले आगामी खेलमा राम्रो प्रदर्शन गर्ने विश्वाससमेत व्यक्त गरे। लगातारको अपराजित यात्रामा पूर्णविराम लागे पनि बाँकी दुई खेलमा सुधारिएको प्रदर्शन गर्दै प्लेअफमा स्थान बनाउने लक्ष्यमा लुम्बिनी केन्द्रित रहेको उनको भनाइ छ।