तिहारलाई फूल र मालाको पर्वका रूपमा समेत चिनिन्छ। यस अवसरमा घरका झ्याल, ढोका, दियोघर तथा कलश सजाउन फूलको प्रयोग गरिने भएकाले बजारमा यसको माग उच्च हुने गरेको छ। अहिले उपभोक्ताहरू घर, कार्यालय तथा विभिन्न व्यापारिक प्रतिष्ठान सजाउन र भाइटीकाका लागि माला खरिद गर्न व्यस्त देखिन्छन्।
फूल तथा माला बिक्री गर्ने व्यवसायी र उपभोक्तालाई सहज बनाउन काठमाडौं महानगरपालिकाले विभिन्न स्थानलाई बिक्रीस्थलका रूपमा तोकेको छ। महानगरले निर्धारण गरेका स्थानमा व्यवसायीहरूले पसल सञ्चालन गरिरहेका छन् भने उपभोक्ताहरूले त्यहीँबाट फूल तथा माला खरिद गरिरहेका छन्।
महानगरपालिकाले नयाँ बानेश्वर क्षेत्रमा एनबी सेन्टर र आईप्लेक्स मल, शंखमुलको बिग मार्ट, मध्यबानेश्वरको सेल्सबेरी, बत्तीसपुतलीको फोनेक्स टावर, तीनकुने चौर र सिफल चौरलाई बिक्रीस्थल तोकेको छ।
त्यस्तै, चाबहिल क्षेत्रमा एसी कम्प्लेक्स, गणेशस्थान तरकारी बजार र केएल टावर अगाडिको क्षेत्रलाई पनि स्वदेशी फूलमाला बिक्रीका लागि अनुमति दिइएको छ।
यसैगरी कमलादीस्थित आईटी बिल्डिङ, पुतलीसडकको स्टार मल, अनामनगरको भाटभटेनी, सुन्धाराको काठमाडौं मल, न्युप्लाजास्थित बज्र कम्प्लेक्स (गुड मार्ट), स्वयम्भूको धर्मचक्र पार्क, कलंकीको भाटभटेनी, नयाँ बजारको भ्याली कोल्ड स्टोर तथा माछापोखरीका बुद्ध मल र गुणस्तर खाल्डोलाई समेत बिक्रीस्थलका रूपमा निर्धारण गरिएको छ।
काठमाडौं महानगरपालिकाले स्वदेशी फूल तथा मालाको बिक्री वितरणलाई प्रोत्साहन गर्दै आएको छ। महानगरले तोकेका विभिन्न स्थानबाट अहिले स्वदेशी फूलमाला बिक्री भइरहेको छ।
तिहारको रौनक बढेसँगै बजारमा उपभोक्ताहरूको गतिविधि पनि बढेको छ। कोही भाइटीकाका लागि माला खरिद गर्न व्यस्त छन् भने कोही घर तथा पसल सजावटमा जुटेका छन्। आइतबार लक्ष्मीपूजा परेकाले पनि अहिले घर तथा व्यापारिक प्रतिष्ठानहरू सजाउने काम तीव्र रूपमा भइरहेको छ।