काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले तिहार, नेपाल संवत् र छठ पर्वले सामाजिक सद्भाव तथा राष्ट्रिय एकता थप मजबुत बनाउन सहयोग पुर्याउने विश्वास व्यक्त गरेका छन्।
दीपावली, नेपाल संवत् र छठको अवसरमा सामाजिक सञ्जालमार्फत शुभकामना सन्देश जारी गर्दै उनले यी पर्वले परिवार, समाज र विभिन्न समुदायबीचको आपसी प्रेम, आत्मीयता र एकतालाई अझ प्रगाढ बनाउने बताएका छन्।
विविधताबीच कायम रहेको नेपाली समाजको एकता थप सुदृढ होस् भन्ने कामना गर्दै लामिछानेले तिहार र छठले सबैको जीवनमा सुख, शान्ति, समृद्धि र नयाँ आशा ल्याओस् भन्ने शुभेच्छा व्यक्त गरेका छन्।
उनले उज्यालो र उत्साहको पर्व तिहार तथा आस्था र श्रद्धाको पर्व छठले सामाजिक सम्बन्धलाई थप मजबुत बनाउने विश्वास पनि व्यक्त गरेका छन्।
यसैबीच, राष्ट्रिय एकताको सन्देश दिन रास्वपाले यस वर्षको छठ पर्व जनकपुरधामस्थित गङ्गासागरमा मनाउने भएको छ। सभापति लामिछानेले आफूहरू छठ मनाउन जनकपुरधाम पुग्ने जानकारी दिएका छन्।