बर्दियाको राजापुर नगरपालिका–८ भोगपुरस्थित सडकमा शनिबार राति मोटरसाइकल दुर्घटना हुँदा चालकको मृत्यु भएको छ। भोगपुरबाट सडुवातर्फ जाँदै गरेको से ७ प ५७३८ नम्बरको मोटरसाइकल दुर्घटनामा परी गेरुवा गाउँपालिका–३ लोहरपुर निवासी ४० वर्षीय हरिराम थारुको मृत्यु भएको हो।
दुर्घटनामा गम्भीर घाइते भएका थारुको बर्दिया जिल्ला अस्पताल गुलरियामा उपचारका क्रममा मृत्यु भएको प्रहरीले जनाएको छ।
त्यसैगरी, बाराको कोल्हवी नगरपालिका–२ न्यौपाने टोलस्थित सडकमा मोटरसाइकल दुर्घटना हुँदा २८ वर्षीय अमित मोक्तानको ज्यान गएको छ। शनिबार राति तामागढीबाट कोल्हवीतर्फ आउँदै गरेको म.प्र.०३–०३३ प ४८६४ नम्बरको मोटरसाइकल दुर्घटना हुँदा सोही स्थानका मोक्तान गम्भीर घाइते भएका थिए।
उनको नारायणी अस्पताल वीरगन्जमा उपचारका क्रममा मृत्यु भएको हो। उक्त मोटरसाइकलमा सवार अन्य दुई जना पनि घाइते भएका छन्। उनीहरूको परवानीपुरस्थित एलएस न्युरो अस्पतालमा उपचार भइरहेको छ।
यता, सुनसरीको इटहरी उपमहानगरपालिका–१३ स्थित गणेश पेट्रोल पम्पनजिक ट्रकको ठक्करबाट मोटरसाइकलमा सवार दुई जनाको मृत्यु भएको छ।
शनिबार राति प्रदेश १–०४–००१ ख ०००८ नम्बरको ट्रकले बा.प्र.०२–०२५ प ३१३६ नम्बरको मोटरसाइकललाई ठक्कर दिँदा चालक मोरङको विराटनगर महानगरपालिका–९ निवासी २७ वर्षीय इस्पस अर्याल र मोटरसाइकलमा सवार विराटनगर–२ तिनपैनी निवासी २८ वर्षीय शाश्वत पोखरेलको मृत्यु भएको हो।
दुर्घटनामा गम्भीर घाइते भएका दुवै जनाको कोशी अस्पताल विराटनगरमा उपचारका क्रममा मृत्यु भएको प्रहरीले जनाएको छ।
सुनसरीमा भएको दुर्घटनापछि प्रहरीले ट्रक चालकलाई नियन्त्रणमा लिएको छ। तीनवटै जिल्लामा भएका दुर्घटनाबारे प्रहरीले थप अनुसन्धान गरिरहेको जनाएको छ।