काठमाडौं । कुकुर तिहारको अवसरमा भक्तपुरको सानोठिमीस्थित श्री भैरव वाहन गुल्ममा तालिमप्राप्त कुकुरहरूले विभिन्न सैनिक कला प्रदर्शन गरेका छन्।
यमपञ्चकको दोस्रो दिन नरक चतुर्दशी तथा कुकुर तिहारका अवसरमा आयोजित कार्यक्रममा कुकुरहरूले दौड प्रतियोगितादेखि बेपत्ता व्यक्तिको खोजीसम्मका सीप प्रस्तुत गरेका थिए।
कार्यक्रममा शङ्कास्पद वस्तु पहिचान तथा निगरानी, अपराधीको गन्ध सुँघेर खोजी गर्ने, हाई जम्पलगायतका अभ्यास प्रदर्शन गरिएको थियो। सोही अवसरमा गुल्ममा रहेका सबै कुकुरको सामूहिक पूजा पनि गरिएको थियो।
कार्यक्रममा नेपाली सेनाका उपरथी हरेन्द्र पाठकले कुकुरलाई इमानदार, अनुशासित र कर्तव्यनिष्ठ जनावरका रूपमा व्याख्या गरे। धार्मिक विश्वासअनुसार कुकुरलाई भगवान् भैरवको वाहनका रूपमा समेत सम्मान गरिने उनले बताए।
कुकुर तिहारका अवसरमा नेपाली सेना, नेपाल प्रहरी, सशस्त्र प्रहरी बल तथा सर्वसाधारणले पनि कुकुरको पूजा गरेका छन्।
हिन्दू धार्मिक परम्परामा कुकुरलाई यमराजको दूतका रूपमा लिने गरिन्छ। आज्ञापालक, वफादार र सुरक्षाका दृष्टिले भरपर्दो जनावर मानिने कुकुरप्रति सम्मान प्रकट गर्न यस दिन विशेष पूजा गर्ने चलन छ।
धार्मिक मान्यताअनुसार यमलोकका द्वारपालका रूपमा रहेका श्याम र सबल नामका कुकुरलाई प्रसन्न पार्दा यमलोकको यात्रा सहज हुने विश्वास गरिन्छ। यही मान्यताअनुसार कुकुरलाई फूलमाला लगाएर मिठा परिकार खुवाउँदै पूजा गरी कुकुर तिहार मनाउने परम्परा रहिआएको छ।
