काठमाडौं । भोटेकोशी बाढी तथा त्यससँगै आएको पहिरोमा परी मृत्यु हुनेको संख्या १ हजार ३ सय ४१ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बिहान ११ बजेसम्मको अद्यावधिक विवरणमा उक्त संख्या पुगेको हो।
सबैभन्दा धेरै चितवनमा ३६२, नवलपरासी पूर्वमा २२२, नवलपरासी पश्चिममा २२०, नुवाकोटमा १९५ र रसुवामा १६३ जनाको शव फेला परेको छ। यस्तै गोरखामा ७४, धादिङमा ६७ र तनहुँमा ३८ जनाको शव भेटिएको छ। फेला परेका शवमध्ये ९८ जनाको मात्रै सनाखत भएको छ।
प्राधिकरणका अनुसार अझै ४ हजार ९ सय ९६ जना सम्पर्कविहीन छन्। बेपत्ताको सूचीमा पहिचान नभएका शव तथा उद्धार गरिएका व्यक्तिसमेत पर्न सक्ने भएकाले तथ्यांक रुजु भइरहेको छ।
हालसम्म १३ हजार १०४ जनाको सकुशल उद्धार गरिएको छ भने बाढी तथा पहिरोमा घाइते भएका ६ हजार ७५ जनाको उपचार गरिएको छ। विस्थापितका लागि रसुवा, नुवाकोट, धादिङ र काठमाडौंमा ३९ वटा होल्डिङ सेन्टर स्थापना गरिएका छन्।
विपद् व्यवस्थापनका लागि २१ हजार ४६५ सुरक्षाकर्मी परिचालन गरिएको छ। राहत सामग्री ढुवानीका लागि ८३ ट्रक र ३८ बोलेरो प्रयोग गरिएको छ भने नेपाली सेना तथा सशस्त्र प्रहरीका हेलिकप्टरबाट १८२ पटक उडान गरी राहत पुर्याइएको प्राधिकरणले जनाएको छ।