सत्तारुढ दल राष्ट्रिय स्वतन्त्र पार्टी (रास्वपा)का सांसद सुरेशकुमार चौधरीले भूमिहीन सुकुम्बासी, अव्यवस्थित बसोबासी, मुक्तकमैया र कमलरीलगायतलाई लालपुर्जा वितरण गर्ने काम तीव्र बनाउन सरकारको ध्यानाकर्षण गराएका छन्।
प्रतिनिधिसभाको बिहीवारको बैठकमा बोल्दै उनले बर्दियाबाट भूमिहीन सुकुम्बासीलाई जग्गा वितरणको काम सुरु हुनु सकारात्मक भए पनि उक्त कार्यले गति लिन नसकेको बताए।
उनले देशका सबै जिल्लामा रहेका भूमिहीन सुकुम्बासी, अव्यवस्थित बसोबासी तथा मुक्तकमैयाको व्यवस्थापनको काम तीव्र बनाउन सरकारसँग माग गरे। बाँके जिल्लामा हजारौँको संख्यामा रहेका सुकुम्बासी तथा अव्यवस्थित बसोबासीको समस्या अझै समाधान हुन नसकेको उनले बताए।
उनले भने, ‘सभामुख महोदय, खुसीको कुरा भूमिहीन सुकुम्बासीलाई जग्गा प्रदान गर्ने काम बर्दियाबाट सुरु भयो। हामीले सोचेका थियौँ, अब यो काम देशका ७७ वटै जिल्लामा सुरु हुन्छ। मेरो जिल्ला बाँकेमा हजारौँको संख्यामा सुकुम्बासी, अव्यवस्थित बसोबासी, बाढीपीडित लगायत मुक्तकमैया, कमलरी तथा होल्डिङ सेन्टरमा राखिएका सुकुम्बासीहरूको समस्या अस्तव्यस्त रहेको छ। यसप्रति सरकारको ध्यानाकर्षण गराउन चाहन्छु। समयमा सबैलाई समान ढंगबाट लालपुर्जा वितरण गर्न देशभर छिटोभन्दा छिटो काम अगाडि बढाइयोस्।’
चौधरीले होल्डिङ सेन्टरमा रहेका सुकुम्बासी नागरिकको अवस्था अस्तव्यस्त रहेको भन्दै यसतर्फ सरकार गम्भीर बन्नुपर्ने बताए।