सिरियाको पूर्वी प्रान्त देइर अल–जोरमा रहेको एक सैन्यस्थलमा विस्फोट हुँदा ११ जना सुरक्षाकर्मीको मृत्यु भएको छ।
सिरियाको रक्षा मन्त्रालयले शुक्रबार भएको विस्फोटमा मृत्यु भएका आफ्ना ११ जना सैनिकको शनिबार अन्त्येष्टि गरेको सरकारी सञ्चारमाध्यमले जनाएको छ। प्रान्तीय राजधानी देइर अल–जोर शहरको राष्ट्रिय अस्पतालमा मृतक सैनिकहरूको अन्तिम बिदाइ तथा अन्त्येष्टि कार्यक्रम आयोजना गरिएको थियो।
उनीहरू प्रान्तीय राजधानीको पश्चिममा रहेको अयाश क्षेत्रमा भएको विस्फोटमा मारिएका थिए। स्थानीय अधिकारीहरूका अनुसार विस्फोट हतियार भण्डारणस्थलमा भएको थियो।
विस्फोटपछि उद्धार, स्वास्थ्य तथा सुरक्षा टोली घटनास्थलमा परिचालन गरिएको थियो। उद्धार टोलीले घाइते तथा बेपत्ता भएका व्यक्तिको खोजीसमेत गरेको थियो।
विस्फोटको वास्तविक कारणबारे अनुसन्धान भइरहेको छ। घटनाबारे हालसम्म कुनै आधिकारिक निष्कर्ष सार्वजनिक गरिएको छैन।
देइर अल–जोर प्रान्त इराकसँग सीमा जोडिएको क्षेत्र हो र यसको बीचबाट युफ्रेटिस नदी बग्छ। सिरियामा लामो समय चलेको द्वन्द्वका क्रममा यो क्षेत्र प्रमुख युद्धभूमिमध्ये एक थियो।
युद्ध समाप्त भए पनि यस क्षेत्रमा अझै सुरक्षा चुनौती कायम रहेको छ। साथै, द्वन्द्वका क्रममा छोडिएका हतियार तथा विस्फोट नभएका विस्फोटक पदार्थका कारण स्थानीय बासिन्दाका लागि जोखिम रहँदै आएको छ।