अफगानिस्तानको जनस्वास्थ्य मन्त्रालयले पोलियो भाइरसविरुद्ध राष्ट्रव्यापी खोप अभियान सुरु गरेको छ । यस अभियानमार्फत पाँच वर्षमुनिका १ करोड २७ लाखभन्दा बढी बालबालिकालाई पोलियो रोगविरुद्धको खोप लगाउने लक्ष्य राखिएको छ ।
सोमबारदेखि सुरु भएको यो अभियान बिहीबारसम्म जारी रहनेछ । यद्यपि, भौगोलिक कठिनाइ र आवश्यकतालाई मध्यनजर गर्दै दक्षिणी प्रान्तहरूमा भने खोप अभियान शुक्रबारसम्म विस्तार गरिने मन्त्रालयले जनाएको छ ।
पोलियो उन्मूलनका लागि सरकारी तथा अन्तर्राष्ट्रिय प्रयासहरूको निरन्तरतास्वरूप यो अभियान सञ्चालन गरिएको हो । मन्त्रालयका प्रवक्ता शराफत जमान अमरखिलले अभियानलाई सफल बनाउन धार्मिक गुरुहरू, स्थानीय समुदायका अगुवाहरू र अभिभावकहरूलाई स्वास्थ्यकर्मीसँग पूर्ण समन्वय र सहयोग गर्न आह्वान गरेका छन् ।
लामो समयदेखि द्वन्द्व र अस्थिरताको चपेटामा परेको अफगानिस्तानमा पोलियो अझै पनि गम्भीर जनस्वास्थ्य चुनौतीका रूपमा रहेको छ । विश्वका थोरै मुलुकमा मात्र पोलियोको जोखिम कायमै रहेको अवस्थामा अफगानिस्तानले निरन्तर यस्ता खोप अभियान सञ्चालन गर्दै आएको छ ।
स्वास्थ्य अधिकारीहरूले यस पटकको अभियानलाई विगतको तुलनामा थप प्रभावकारी बनाउने योजना बनाएका छन्, ताकि खोपको पहुँचबाट कुनै पनि बालबालिका वञ्चित नहोउन् ।