राष्ट्रिय स्वतन्त्र पार्टी (रास्वपा) का सांसद हरिमोहन भण्डारीले संघीय संसद्को क्यान्टिन महँगो भएको गुनासो गरेका छन् ।
बुधबारको प्रतिनिधि सभा बैठकमा बोल्दै उहाँले यस्तो गुनासो गरेका छन् । उहाँले क्यान्टिनको मूल्य अस्वाभाविक रूपमा महँगो भएको भन्दै माननीयहरूको तलबले खानपान र खर्च धान्न कठिन भएको व्यङ्ग्य गरेका छन् । उहाँले क्यान्टिनको गुणस्तर र मूल्य नियन्त्रण गर्न अविलम्ब कदम चाल्नुपर्ने आवश्यकता औँल्याएका छन् । त्यहाँ लामखुट्टेको प्रकोपसमेत बढेको गुनासो गरेका छन् ।
उहाँले भने, ‘क्यान्टिनमा रेटको कुनै तालमेल छैन । खाजा महँगो छ, जसले गर्दा माननीयहरूले सास्ती भोग्नुपरेको छ । भोकभोकै बस्नुपर्ने वा महँगो मूल्य तिर्नुपर्ने दुवै विकल्प पीडादायी छन्, यसतर्फ संसद् सचिवालयको ध्यान जानु जरुरी छ ।’
सांसद भण्डारीले आफ्नो निर्वाचन क्षेत्रमा प्राकृतिक विपत्तिले जनजीवन प्रभावित भएको बताएका छन् ।