नेपाली काँग्रेसका सांसद मदनकृष्ण श्रेष्ठले मौसम पूर्वानुमान महाशाखाले चेतावनी दिएको भारी वर्षाको सम्भावित जोखिमलाई मध्यनजर गर्दै अविलम्ब पूर्वतयारी गर्न सरकारसँग माग गरेका छन् ।
बिहीवार बसेको प्रतिनिधि सभा बैठकमा उनले विपद्को सूचनालाई मात्रै सुरक्षा नमान्दै व्यवहारिक र प्रभावकारी उद्धार योजना पेश गर्न गृहमन्त्रीको ध्यानाकर्षण गराएका हुन् । सांसद श्रेष्ठले हालैको विनाशकारी बाढीको पीडा ताजै रहेको उल्लेख गर्दै अब आउन सक्ने थप जोखिमलाई रोक्न सरकारले ‘पर्ख र हेर’को नीति त्याग्नुपर्ने बताए ।
उनले सरकारसमक्ष पाँच बुँदे माग राख्दै जोखिमयुक्त बस्ती र परिवारको तत्काल पहिचान गरी स्थानान्तरणको व्यवस्था मिलाउनुपर्नेमा जोड दिए । श्रेष्ठले सरकारी वेबसाइटमा मात्रै सूचना राख्ने परम्परागत शैलीभन्दा माथि उठेर स्थानीय रेडियो, टेलिफोन, साइरन र घरदैलोमार्फत नागरिकसम्म पूर्वसूचना पुर्याउनुपर्ने बताए ।
उनले भने, ‘पूर्वानुमान परिवर्तन हुन सक्छ, तर नागरिकको सुरक्षा सुनिश्चित गर्न अहिलेदेखि नै तयारी थाल्नुपर्छ । विपत्ति निश्चित भइसकेपछि मात्र तातेर केही हुँदैन ।’
सडक सुरक्षा र निर्माणस्थलका श्रमिकको जीवन रक्षामा विशेष ध्यान दिन आग्रह गर्दै उनले दशैँको मुखमा यात्रुको चाप बढ्ने भएकाले जोखिमपूर्ण सडक खण्डको अनुगमन र वैकल्पिक मार्गको व्यवस्थापन गर्न माग गरे । उनले उद्धार सामग्री र औषधि स्थानीय तह नजिकै पूर्वतयारीका साथ राख्न तथा सुरक्षाकर्मीको समेत सुरक्षा सुनिश्चित गर्न सरकारलाई सचेत गराए ।