काठमाडौं । त्रिभुवन अन्तर्राष्ट्रिय विमानस्थलबाट सुनसहित दुई जना पक्राउ परेका छन्। पक्राउ पर्नेमा एक भारतीय नागरिक र एक नेपाली नागरिक रहेका छन्।
प्रहरीका अनुसार कतारको दोहाबाट काठमाडौं आएका ४२ वर्षीय भारतीय नागरिक मोहम्मद चेरा थोडीलाई विमानस्थलको पार्किङ क्षेत्रबाट नियन्त्रणमा लिइएको हो। उनको साथबाट ५३६ ग्राम सुन फेला परेको प्रहरीले जनाएको छ।
अर्का नेपाली नागरिक पनि नियन्त्रणमा
यसैगरी, कतारबाटै नेपाल आएका बाराको पचरौता नगरपालिका–१ पिपरपाटीका ३३ वर्षीय अनिश अन्सारी पनि सुनसहित पक्राउ परेका छन्।
प्रहरीका अनुसार अन्सारीको साथबाट ६९.६ ग्राम सुन बरामद गरिएको छ।
विमानस्थल सुरक्षा प्रहरी कार्यालयका अनुसार पक्राउ परेका दुवै जनालाई बरामद सुनसहित थप अनुसन्धानका लागि प्रहरी वृत्त गौशाला पठाइएको छ।
घटनाबारे प्रहरीले थप अनुसन्धान अघि बढाएको जनाएको छ।