काठमाडौं । सत्तारुढ दल राष्ट्रिय स्वतन्त्र पार्टी (रास्वपा)का सभापति रवि लामिछानेले विपद्का समयमा हुने ‘भीआईपी’ मुभमेन्टले सुरक्षा निकायलाई थप चुनौती सिर्जना गर्ने भन्दै आफू र आफ्नो दलका सांसदहरूका लागि कुनै पनि विशेष सुरक्षा प्रबन्ध नगर्न आग्रह गरेका छन्।
बुधबार प्रतिनिधि सभाको बैठकमा बोल्दै सभापति लामिछानेले अत्यावश्यक अवस्थाबाहेक आफू फिल्डमा नजाने र सरकारलाई प्रभावकारी रूपमा काम गराउन भूमिका खेल्ने बताएका छन्। कुनै कारणवश प्रभावित क्षेत्रमा पुग्नुपरे पनि अतिरिक्त सुरक्षा वा अन्य सुविधा नलिन र प्रशासनको काममा बाधा नपुर्याउन उनले आग्रह गरेका छन्।
लामिछानेले प्रभावित क्षेत्रमा सञ्चार सेवा सहज बनाउन सरकारले चालेको कदमको स्वागत गरेका छन्। टेलिफोनमा ब्यालेन्स नहुँदा पनि कुराकानी गर्न मिल्ने तथा डाटा उपलब्ध गराउने विषयमा सरकारले पहल गरिरहेको जानकारी आफूले पाएको उनले बताएका छन्।
उनले भने, “विपद्का बेला भीआईपी मुभमेन्टले सुरक्षाकर्मीका लागि चुनौती सिर्जना गर्दछ। म र मेरो दलका सांसदहरू फिल्डमा जाँदा सुरक्षाकर्मीले कुनै चिन्ता लिनुपर्ने छैन। हामीलाई कतै पनि ध्यान दिनुपर्ने छैन। सरकार आफैँ प्रभावित क्षेत्रमा पुगोस्। हामीमध्ये कोही पुग्नुपरेको खण्डमा पनि अतिरिक्त सुरक्षा र सेवा लिने छैनौँ। हामी व्यक्तिगत तवरबाट जानेछौँ र प्रशासनको काममा कुनै दखलअन्दाज हुने छैन।”
लामिछानेले विपद्का समयमा सीमान्तकृत तथा अल्पसङ्ख्यक समुदाय सबैभन्दा बढी प्रभावित हुने भन्दै उनीहरूको उद्धार तथा राहतमा प्राथमिकता दिन सरकारको ध्यानाकर्षण गराएका छन्।
विशेषगरी महिला, गर्भवती, वृद्धवृद्धा, अपाङ्गता भएका व्यक्ति तथा दलित समुदाय विपद्बाट बढी प्रभावित हुने गरेको भन्दै राहत र उद्धारमा ती वर्गलाई प्राथमिकता दिनुपर्नेमा उनले जोड दिएका छन्।