नेपालका चार जुडो खेलाडीले २०औँ एसियाली खेलकुदमा खराब प्रदर्शन गर्दै पहिलो चरणमै हारको सामना गरेका छन्।
जापानको नागोयामा बुधवार भएको खेलमा नेपालका विशेष र विकास विक तथा देवकीमाया र निशा श्रेष्ठ पहिलो चरणमै बाहिरिएका छन्। आइची इन्टरनेसनल एरिनामा भएको खेलमा चारै खेलाडीले अपेक्षाकृत कमजोर प्रदर्शन गरेका छन्। चारमध्ये निशा र विकास निर्धारित समयसम्म टिक्नै सकेनन्।
पुरुष ६० केजीमुनि तौल समूहमा विकास उज्बेकिस्तानका समरिद्दिन कुचकारोभसँग इप्पोनको आधारमा पराजित भएका छन्। यी दुवैले पहिलो चरणमा बाई पाएका थिए। तर, विकासले त्यसलाई सदुपयोग गर्न सकेनन्। समरिद्दिन एसियन जुनियर विश्व च्याम्पियनसिपका स्वर्ण विजेता हुन्।
कुल चार मिनेटको खेलमा विकास म्याटमा एक मिनेट पनि टिक्न नसकी नतिजा सुम्पिन बाध्य भएका छन्। पहिलो सेकेन्डदेखि नै समरिद्दिन आक्रामक देखिएका थिए। अन्ततः उनले विकासमाथि ४८ सेकेन्डभित्रै बाजी मारे।
महिला ४८ केजी तौल समूहमा पनि निशाले खराब प्रदर्शन गरेकी छन्। उनी हङकङकी योङ का लीसँग इप्पोनको आधारमा पराजित भएकी छन्। २ मिनेट ३२ सेकेन्डमै निशाले नतिजा सुम्पिएकी थिइन्।
महिला ५२ केजीमा देवकीमायाले पनि पहिलो चरणमा भियतनामकी लाम थी एनगान हासँग युको आधारमा पराजय व्यहोरेकी छन्। अनुभवी खेलाडी देवकीमायाले अन्तिम समयसम्म चुनौती दिएकी थिइन्। तर, खेल सकिन २० सेकेन्ड बाँकी छँदा युको सामना गर्न पुगेपछि देवकीमाया पराजित भएकी छन्।
त्यसअघि दुवैले सिदो (पहेंलो कार्ड) सामना गरेका थिए। देवकीमाया निशाकी दिदी हुन्। अर्का पराजित खेलाडी विकास र विशेष पनि दाजुभाइ हुन्।
विशेष भने पुरुष ६६ केजी तौल समूहमा हङकङका वाङ का कीसँग वाजारिको आधारमा पराजित भएका छन्। विशेषले चार मिनेटसम्म चुनौती दिए पनि अन्ततः पराजित भएका छन्।
अब नेपालबाट दुई विधामा पुनम श्रेष्ठले महिला ७० केजीमुनि तौल समूह र सुजन गुरुङले पुरुष ९० केजीमुनि तौल समूहमा प्रतिस्पर्धा गर्नेछन्। साथै, नेपालले मिक्स टिममा पनि प्रतिस्पर्धा गर्नेछ।