सूचना तथा सञ्चारमन्त्री डा. विक्रम तिमिल्सिनाले विज्ञापन नीति र लोककल्याणकारी विज्ञापनबारे संसदमा उठेका प्रश्नको जवाफ दिँदै सञ्चार क्षेत्रलाई नियन्त्रण गर्ने सरकारको कुनै योजना नरहेको स्पष्ट पार्नुभएको छ ।
बुधवार बसेको प्रतिनिधि सभा बैठकमा उहाँले सञ्चारमाध्यमहरूलाई आत्मनिर्भर र जीवन्त बनाउन सरकार केन्द्रित रहेको बताउनुभयो । सञ्चारमन्त्री तिमिल्सिनाले विज्ञापन बजारलाई व्यवस्थित बनाउन र मिडियालाई ‘सेल्फ–सस्टेन’ (आत्मनिर्भर) बनाउन नयाँ विज्ञापन नीति–२०८३ ल्याइएको जानकारी गराउनुभयो । उहाँले राज्यको चौथो अङ्गका रूपमा रहेको प्रेसको स्वतन्त्रताप्रति सरकार पूर्ण प्रतिबद्ध रहेको दाबी गर्दै प्रेस स्वतन्त्रता र मानव अधिकारको रक्षा गर्नु लोकतन्त्रको आधारस्तम्भ भएको उल्लेख गर्नुभयो ।
लोककल्याणकारी विज्ञापनको रकम कटौती र कार्यविधिबारे सांसदहरूले उठाएको प्रश्नमा मन्त्रीले आपत्ति जनाउनुभयो । उहाँले कार्यविधिलाई ‘संसदीय सार्वभौमिकताको अपमान’ भनी गरिएको टिप्पणी निराधार रहेको बताउँदै सञ्चार मन्त्रालयमा यसबारे प्रमाणसहित छलफल गर्न सांसदहरूलाई आग्रह गर्नुभयो । मन्त्रालयको निर्णय प्रक्रियामा हुने अनियमितता रोक्न र विधि स्थापना गर्न उक्त कार्यविधि ल्याइएको उहाँको भनाइ छ ।
यस्तै, नेपाल टेलिभिजनमा प्रसारित कार्टुन सामग्रीमार्फत धर्मान्तरणलाई प्रोत्साहन गरेको भनी उठेको प्रश्नमा मन्त्री तिमिल्सिनाले सरकारले आवश्यक कदम चालिसकेको स्पष्ट पार्नुभयो । सार्वजनिक प्रसारणमा पैसा लिएर धार्मिक सामग्री प्रसारण गर्ने प्रवृत्ति बन्द गर्न पब्लिक सर्भिस ब्रोडकास्टिङ नेपाललाई निर्देशन दिइसकेको उहाँले जानकारी दिनुभयो । सबै धर्मप्रति सरकार संवेदनशील रहेको र धार्मिक सहिष्णुता कायम राख्न सरकार प्रतिबद्ध रहेको उहाँको भनाइ छ ।
साथै, कीर्तिमानी आरोही निर्मल पुर्जाको सम्मानमा हुलाक टिकट प्रकाशन गर्ने विषयमा मन्त्रालय र हुलाक सेवा विभागबीच छलफल भइरहेको र छिट्टै निर्णय हुने मन्त्रीले जानकारी गराउनुभयो । चिकित्सा क्षेत्रका घटनामा प्रेस काउन्सिल नेपालसँगको समन्वयमा सत्यतथ्य छानबिन हुने पनि उहाँले आश्वासन दिनुभयो ।