काठमाडौं । नेपालले मलेसियाविरुद्धको दुई खेलको एकदिवसीय अभ्यास शृंखला क्लिन स्वीप गरेको छ। बिहीबार भएको दोस्रो तथा अन्तिम खेलमा नेपालले घरेलु टोलीलाई २७ रनले पराजित गर्दै शृंखला २–० ले जितेको हो।
क्वालालम्पुरस्थित सेलान्गोर टर्फ मैदानमा नेपालले दिएको १७१ रनको लक्ष्य पछ्याएको मलेसिया ४०.१ ओभरमा १४३ रनमै अलआउट भयो।
मलेसियाका अकिल वाहिदले सर्वाधिक ५६ रन बनाए। उनले १०८ बलमा ६ चौका प्रहार गरे। नजमुस सकिबले ९ चौकासहित ५१ रन जोड्दा कप्तान सैयद अजिजले १० रन बनाए।
नेपालका ललितनारायण राजवंशीले ३ विकेट लिए। दीपेन्द्रसिंह ऐरी, रोहितकुमार पौडेल र कप्तान सन्दीप लामिछानेले २–२ विकेट लिए भने हेमन्त धामीले १ विकेट लिए।
यसअघि टस जितेर पहिले ब्याटिङ गरेको नेपालले ४१.४ ओभरमा सबै विकेट गुमाउँदै १७० रन बनाएको थियो। नेपालका रोहितकुमार पौडेलले सर्वाधिक ६१ रनको योगदान गरे। उनले ८६ बलमा ३ चौका र ३ छक्का प्रहार गरे।
गुल्सनकुमार झाले ४५ रन बनाए भने कप्तान सन्दीप लामिछानेले १३ तथा अर्जुन कुमाल र आसिफ शेखले समान १० रन जोडे। छैटौँ विकेटका लागि रोहित र गुल्सनबीच ५९ रनको साझेदारी भएको थियो।
मलेसियाका अकिल वाहिदले ४ विकेट लिए। सैयद अजिजले ३, रिजवान हैदरले २ तथा अमिर अजिमले १ विकेट लिए।
नेपालले आगामी एसीसी प्रिमियर कपको तयारीस्वरूप मलेसियासँग दुई खेलको अभ्यास शृंखला खेलेको हो। पहिलो खेलमा नेपाल ९ विकेटले विजयी भएको थियो।