काठमाडौँ । राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर शाहीले वर्तमान सरकारको ६ महिनाको कार्यकालप्रति प्रश्न उठाउँदै भ्रष्टाचार नियन्त्रण तथा दोषीमाथि कानुनी कारबाही गर्न ढिलाइ नगर्न सरकारलाई आग्रह गरेका छन्।
प्रतिनिधि सभाको शुक्रबार बसेको बैठकमा बोल्दै शाहीले सरकारले प्रतिशोधको राजनीति त्यागेर सुशासन र रोजगारी सिर्जनाका लागि स्पष्ट तथा प्रभावकारी नीति ल्याए आफ्नो पार्टीले बिना सर्त सहयोग गर्ने बताएका हुन्।
उनले तत्कालीन जनआन्दोलनका क्रममा भएका हत्या, हिंसा तथा सिंहदरबार र संसद् भवनमा भएको तोडफोडका घटनामा संलग्नलाई कानुनी दायरामा ल्याउन सरकार गम्भीर हुनुपर्ने बताए। जनआन्दोलनको भावना र नागरिकको अपेक्षाअनुसार सरकार अघि बढ्न नसकेको उनको टिप्पणी थियो।
शाहीले लामो समयदेखि चर्चामा रहेका एनसेल, गिरीबन्धु टी–स्टेट, भुटानी शरणार्थी प्रकरण तथा चिनियाँ विमान खरिदसम्बन्धी विषयको छानबिनबारे पनि सरकारसँग जवाफ मागे। कानुनलाई राजनीतिक प्रतिशोधका लागि नभई न्याय सुनिश्चित गर्न प्रयोग गर्नुपर्नेमा उनले जोड दिए।
उनले राप्रपा सरकारको प्रतिपक्षमा रहे पनि सरकारका सबै कामको विरोध गर्ने पक्षमा नरहेको स्पष्ट पारे। भ्रष्टाचारविरुद्ध प्रभावकारी कारबाही अघि बढाइए सडकदेखि संसद्सम्म सरकारलाई सहयोग गर्ने उनको भनाइ थियो।
शाहीले सत्तापक्षका सांसदहरूलाई सरकारका कमजोरी ढाकछोप गर्नुको सट्टा आवश्यक सुधारका लागि सुझाव दिन आग्रह गरे। सरकारका गलत कदमको विरोध गर्नु प्रतिपक्षको जिम्मेवारी भएको भन्दै उनले आफ्नो दल त्यसबाट पछि नहट्ने बताए।
रोजगारीको अवस्थाप्रति चिन्ता व्यक्त गर्दै शाहीले युवाहरू रोजगारीका लागि विदेशिनुपर्ने बाध्यता अन्त्य गर्न सरकारको ध्यानाकर्षण गराए। त्रिभुवन अन्तर्राष्ट्रिय विमानस्थलमा विदेश जाने युवाहरूको भीड देखिने अवस्था परिवर्तन गर्न स्वदेशमै रोजगारीको वातावरण निर्माण गर्नुपर्ने उनको भनाइ छ।
त्यस्तै, ‘एक पटकको नेपाली सधैँको नेपाली’ भन्ने अवधारणालाई अघि बढाउँदै संविधान संशोधनको प्रक्रिया अगाडि बढाउनसमेत उनले माग गरेका छन्।