काठमाडौँ । नेपाली कांग्रेसले आगामी १५औँ महाधिवेशनमा प्रचारप्रसारलाई भड्किलो र तामझामपूर्ण नबनाउने जनाएको छ। महाधिवेशनको तयारीबारे जानकारी दिन शुक्रबार पार्टी केन्द्रीय कार्यालय सानेपामा आयोजित विशेष पत्रकार सम्मेलनमार्फत कांग्रेसले यस्तो नीति सार्वजनिक गरेको हो।
कांग्रेसका प्रवक्ता देवराज चालिसेका अनुसार महाधिवेशनमा वातावरणमैत्री प्रचारप्रसारलाई प्राथमिकता दिइनेछ। पार्टीले सबै उम्मेदवारलाई प्रचारका क्रममा प्रविधिको अधिकतम प्रयोग गर्न आग्रह गरेको छ।
चालिसेले महाधिवेशनका क्रममा सहरका विभिन्न स्थानमा प्रचार सामग्री टाँसेर भड्किलो प्रचार नगर्ने स्पष्ट पारे। उनका अनुसार पार्टीले वातावरणमा नकारात्मक असर नपर्ने गरी प्रचारप्रसार गर्ने नीति अघि सारेको छ।
महाधिवेशनस्थल तथा आवश्यक स्थानमा प्रचारका लागि डिजिटल बोर्डको व्यवस्था गरिने प्रवक्ता चालिसेले जानकारी दिए। यससँगै उम्मेदवारहरूलाई प्रचारप्रसारका लागि कागजी पर्चा तथा पोस्टर नछाप्न पनि आग्रह गरिएको उनले बताए।
कांग्रेसले प्रविधिमैत्री र वातावरणमैत्री प्रचारप्रसारमार्फत महाधिवेशनलाई व्यवस्थित बनाउने तयारी गरेको जनाएको छ।