राष्ट्रिय सभाकी सदस्य एवं नेकपा एमालेकी मुख्य सचेतक रोशनी मेचेले वर्तमान सरकारको कार्यशैलीप्रति असन्तुष्टि व्यक्त गरेकी छन् ।
शुक्रवार बसेको राष्ट्रिय सभाको बैठकमा बोल्दै उनले सरकारको दुई तिहाइको दम्भले सुशासन ओझेलमा परेको र सर्वसाधारण नागरिक महँगी तथा दैनिक उपभोग्य वस्तुको चरम अभाव झेलिरहेको आरोप लगाएकी छन् । सांसद मेचेले सरकार गठन भएयता सेयर बजारमा आएको निरन्तरको गिरावट र निजी क्षेत्रमा छाएको निराशाले अर्थतन्त्र संकटपूर्ण अवस्थामा रहेको बताएकी छन् । महँगीको विषयलाई जोड दिँदै उनले चाडपर्व नजिकिएसँगै जनताको भान्सा महँगिएको र ग्यासको हाहाकार मच्चिएको उल्लेख गरेकी छन् । उनले सरकारले मुद्रास्फीतिलाई नियन्त्रणमा राख्न असफल भएको भन्दै गत वर्षको तुलनामा यस वर्ष मुद्रास्फीति ह्वात्तै बढेको तथ्यांक प्रस्तुत गरेकी छन् ।
उनले भनिन्, ‘आफूले त ग्यास पाउन सकेकी छैन भने सामान्य जनताको अवस्था के होला? हामीले सरकारबाट ठूलो आशा गरेका थियौँ, तर विकास निर्माणका कामहरू ठप्प छन् र बजेट कार्यान्वयन हुन सकेको छैन । मन्त्रीहरूको गैरजिम्मेवार अभिव्यक्तिले समेत नागरिकमा निराशा छाएको छ ।’
संवैधानिक निकायका पदाधिकारीमाथिको व्यवहार, साइबर अपराधमा भएको वृद्धि र विपद् व्यवस्थापनमा संघीय सरकारको फितलो उपस्थितिप्रति पनि उनले गम्भीर ध्यानाकर्षण गराएकी छन् । – न्युज एजेन्सी नेपाल
#RoshniMeche #CPNUML #NationalAssemblyNepal #NepalParliament #InflationNepal #EconomyNepal #NepalPolitics #NepalNews