काठमाडौं । नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवाले गोरखाको बूढीगण्डकी नदीमा आएको बाढीले नदी आसपासका बस्तीमा पुर्याएको क्षतिप्रति दुःख व्यक्त गरेका छन्।
बाढीका कारण स्थानीय बस्तीमा भौतिक संरचनामा क्षति पुग्नुका साथै सर्वसाधारणको दैनिक जीवन प्रभावित भएको घटनाप्रति देउवाले चिन्ता व्यक्त गर्दै प्रभावित नागरिकप्रति सहानुभूति प्रकट गरेका छन्।
सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले बूढीगण्डकी र त्रिशूली नदीका तटीय क्षेत्रमा बसोबास गर्ने नागरिकलाई सम्भावित जोखिमबाट जोगिन सतर्कता अपनाउन र सुरक्षित स्थानमा बस्न आग्रह गरेका छन्।
विपद्बाट प्रभावित नागरिकको उद्धार तथा राहत वितरणमा सहयोग पुर्याउन देउवाले पार्टीका नेता र कार्यकर्तालाई सक्रिय हुन निर्देशन दिएका छन्। बाढी प्रभावित क्षेत्रमा रहेका नागरिकलाई तत्काल सहयोग आवश्यक रहेकाले उद्धार र राहतका काममा जुट्न उनले पार्टीका सदस्यहरूलाई अपिल गरेका छन्।
लगातार भइरहेको वर्षाका कारण नदीमा पानीको सतह बढ्न सक्ने जोखिम रहेकाले स्थानीय प्रशासनले पनि नदी किनारमा बसोबास गर्ने नागरिकलाई सावधानी अपनाउन र नदीको नजिक नजान आग्रह गरेको छ।