काठमाडौं । प्रमुख प्रतिपक्षी दल नेपाली काँग्रेसका सभापति गगनकुमार थापाले प्राकृतिक विपद्को समयमा सरकारलाई पूर्ण सहयोग गर्दै सरकारका कमजोरी सच्याउन खबरदारी गर्ने बताएका छन्।
बाढीपहिरोपछि उत्पन्न अवस्था तथा पार्टीको भूमिकाबारे काँग्रेस केन्द्रीय कार्यालय सानेपामा आयोजित बैठकमा थापाले विपद् व्यवस्थापनलाई संस्थागत र प्रभावकारी बनाउनुपर्नेमा जोड दिए।
जाजरकोट भूकम्पलगायत विगतका विपद्बाट प्राप्त अनुभव र ज्ञानलाई संस्थागत गरी आगामी दिनमा विपद् व्यवस्थापनमा उपयोग गर्नुपर्ने थापाले बताए। पार्टीका कार्यकर्तालाई आवश्यक तालिम दिएर प्रभावित क्षेत्रमा परिचालन गर्न सके उद्धार तथा राहतमा महत्वपूर्ण सहयोग पुग्ने उनको भनाइ छ।
प्रमुख प्रतिपक्षी दलका रूपमा काँग्रेसले विपद्को समयमा सरकारसँग काँधमा काँध मिलाएर अघि बढ्ने तर सरकारका कमजोरी औँल्याउन पनि पछि नहट्ने थापाले स्पष्ट पारे। उनले काँग्रेसले सरकारलाई बुझाएको नौबुँदे ध्यानाकर्षण पत्रलाई गम्भीरतापूर्वक लिन प्रधानमन्त्रीको ध्यानाकर्षणसमेत गराए।
विपद् व्यवस्थापनमा संघ, प्रदेश र स्थानीय सरकारबीच प्रभावकारी समन्वय आवश्यक रहेको थापाले बताए। विशेषगरी राहत वितरणको नेतृत्व स्थानीय तहलाई दिनुपर्ने उनको धारणा छ। स्थानीय आवश्यकता तथा ज्येष्ठ नागरिक, महिला र बालबालिकाका विशिष्ट समस्याबारे स्थानीय तह बढी जानकार हुने भएकाले उनीहरूलाई निर्णय प्रक्रियाबाट बाहिर राख्न नहुने उनले बताए।
संघीय सरकारले प्रदेश र स्थानीय तहलाई ‘टिम प्लेयर’का रूपमा लिएर स्पष्ट कार्यविभाजनसहित अघि बढ्नुपर्ने थापाको माग छ।
विपद्को समयमा पार्टीका नेता तथा कार्यकर्तालाई तडकभडकपूर्ण उत्सव तथा महोत्सव नगर्न उनले निर्देशन दिएका छन्। सामाजिक सञ्जालमा मृतकका शवका तस्बिर तथा हृदयविदारक भिडियो पोस्ट नगर्न पनि उनले आग्रह गरे।
बाढीपहिरो प्रभावित क्षेत्रको स्थलगत अवलोकनका लागि आफू नेतृत्वको टोली सोमबार नै जाने जानकारी दिँदै थापाले विपद्को असर अल्पकालीन समस्या मात्र नभएको बताए।
विगतका विपद्बाट प्राप्त अनुभव र संस्थागत ज्ञानलाई नीतिगत रूपमा अघि बढाउनुपर्नेमा जोड दिँदै थापाले सरकार कहाँ चुकेको छ भन्ने देखाउनु प्रतिपक्षको जिम्मेवारी भएको बताए। सरकारका कमजोरी नऔँल्याए नागरिकका समस्या सरकारसम्म पुग्न नसक्ने उनको भनाइ थियो।
विपद्का कारण अभिभावकविहीन भएका बालबालिकाको पठनपाठन तथा विस्थापित परिवारको पुनःस्थापनाका लागि काँग्रेसले निरन्तर काम गर्ने प्रतिबद्धता जनाएको छ।
बैठकमा थापाले पार्टीको विपद् व्यवस्थापन समितिलाई वडा तहसम्मको यथार्थ विवरण संकलन गरी आवश्यक कार्ययोजना बनाउन निर्देशनसमेत दिएका छन्।