काठमाडौं । त्रिशूली–३ ‘बी’ जलविद्युत् आयोजनामा कार्यरत कर्मचारी, ठेकेदार तथा कामदार गरी २०१ जना सम्पर्कविहीन भएका छन्। बाढीपछि आयोजनाको सुरुङ क्षेत्रमा उनीहरू सम्पर्कविहीन भएको आयोजनाले जनाएको छ।
आयोजनाकी कम्पनी सचिव तथा प्रशासन प्रमुख लीला अर्यालका अनुसार हालसम्म प्राप्त आधिकारिक विवरणअनुसार आयोजनासँग सम्बन्धित २०१ जना सम्पर्कमा आउन सकेका छैनन्।
सम्पर्कविहीन हुनेमा आयोजनाका २१ जना कर्मचारी र उनीहरूका सात जना परिवारका सदस्य छन्। त्यस्तै, परामर्शदाता कम्पनी चेस्कोका १२ जना, लट–१ ठेकेदारतर्फका चार जना चिनियाँ र दुई जना नेपाली नागरिक रहेका छन्।
यसैगरी, काठमाडौं विश्वविद्यालयबाट इन्टर्नसिपका लागि आएका तीन विद्यार्थी, ठेकेदार पक्षका १५१ जना कामदार र एक जना सुरक्षा गार्डसमेत सम्पर्कविहीन रहेको आयोजनाले जनाएको छ।
घटनालगत्तै नेपाली सेनाको १६ सदस्यीय टोली घटनास्थलमा परिचालन गरिएको छ। आयोजनाका प्रबन्ध निर्देशक आनन्द ढुंगेल र वरिष्ठ इन्जिनियर रवीन्द्र सिम्खडा पनि उद्धार तथा खोजी कार्यका लागि घटनास्थलमा खटिएका छन्।
उद्धार तथा उत्खननका लागि आवश्यक उपकरणको प्रयोग र उपलब्धताबारे छलफल गर्दै प्रभावित क्षेत्र पहिचान गर्ने तथा सुरुङभित्र फसेकाहरूको खोजी अघि बढाउने प्रयास भइरहेको आयोजनाले जनाएको छ।