काठमाडौं । रसुवाको भोटेकोसी नदीमा आएको बाढीबाट उत्पन्न संकट र त्यसपछिको खोज तथा उद्धार कार्यबारे प्रधानमन्त्री वालेन्द्र (बालेन) शाहले सुरक्षा निकायका प्रमुखहरूसँग छलफल थालेका छन्।
प्रधानमन्त्री शाहले केहीबेरअघि प्रधानसेनापति अशोकराज सिग्देलसँग भेट गरी रसुवामा बाढीपछि भइरहेको खोजी, उद्धार, राहत तथा व्यवस्थापनका कामबारे जानकारी लिएका छन्।
प्रधानमन्त्रीको सचिवालयका अनुसार शाहले घटनास्थलको पछिल्लो अवस्था, उद्धार कार्यको प्रगति तथा प्रभावित क्षेत्रमा भइरहेका राहत र व्यवस्थापनका प्रयासबारे प्रधानसेनापतिबाट ब्रिफिङ लिएका हुन्।
यसपछि प्रधानमन्त्री शाहले सशस्त्र प्रहरी बल, नेपालका महानिरीक्षक नारायणदत्त पौडेलसँग पनि ब्रिफिङ लिने कार्यक्रम रहेको छ।
त्यस्तै, उनले आजै नेपाल प्रहरीका महानिरीक्षक दानबहादुर कार्कीसँग समेत रसुवाको बाढीबाट उत्पन्न परिस्थितिबारे जानकारी लिने प्रधानमन्त्रीको सचिवालयले जनाएको छ।
भोटेकोसी नदीमा आएको बाढीका कारण रसुवामा जनधनको क्षति तथा विभिन्न क्षेत्रमा अवरोध सिर्जना भएपछि सरकारले उद्धार, खोजी तथा राहतका कामलाई तीव्रता दिएको छ। प्रधानमन्त्री शाहले सुरक्षा निकायका प्रमुखबाट प्रत्यक्ष जानकारी लिएर आवश्यक समन्वय तथा व्यवस्थापनका विषयमा छलफल गरिरहेका छन्।