काठमाडौं । देशभर मनसुन सक्रिय रहेकाले आगामी तीन दिन पनि विभिन्न स्थानमा भारीदेखि धेरै भारी वर्षाको सम्भावना रहेको मौसम पूर्वानुमान महाशाखाले जनाएको छ। महाशाखाका अनुसार सोमबारदेखि बुधबारसम्म विशेषगरी कोसी, वाग्मती र गण्डकी प्रदेशका हिमाली तथा पहाडी क्षेत्रमा वर्षाको जोखिम बढी रहनेछ।
महाशाखाका अनुसार सोमबार (भदौ १५) दिउँसो देशका पहाडी भू–भागसहित वाग्मती, गण्डकी, लुम्बिनी र सुदूरपश्चिम प्रदेशका तराई क्षेत्रमा एक–दुई स्थानमा भारी वर्षा हुन सक्नेछ।
सोमबार राति भने कोसी, वाग्मती र गण्डकी प्रदेशका हिमाली, पहाडी तथा तराई भू–भागका साथै लुम्बिनी प्रदेशका पहाडी क्षेत्रमा भारी वर्षाको सम्भावना रहेको छ। यस क्रममा कोसी र वाग्मती प्रदेशका हिमाली तथा पहाडी भू–भागका एक–दुई स्थानमा धेरै भारी वर्षा हुन सक्ने पूर्वानुमान गरिएको छ।
यस्तै, मंगलबार (भदौ १६) पनि वर्षाको जोखिम कायमै रहनेछ। दिउँसो देशका पहाडी भू–भाग तथा लुम्बिनी र सुदूरपश्चिम प्रदेशका तराई क्षेत्रमा एक–दुई स्थानमा भारी वर्षा हुन सक्नेछ।
मंगलबार कोसी, वाग्मती र गण्डकी प्रदेशका हिमाली तथा पहाडी भू–भागका थोरै स्थानमा भारी वर्षाको सम्भावना छ। सोही क्षेत्रमा एक–दुई स्थानमा धेरै भारी वर्षा समेत हुन सक्ने महाशाखाले जनाएको छ।
बुधबार (भदौ १७) दिउँसो पनि देशका पहाडी भू–भाग तथा लुम्बिनी प्रदेशको तराई क्षेत्रमा एक–दुई स्थानमा भारी वर्षा हुन सक्नेछ। बुधबार राति कोसी, वाग्मती र गण्डकी प्रदेशका हिमाली तथा पहाडी भू–भागका एक–दुई स्थानमा भारी वर्षाको सम्भावना रहेको छ।
लगातारको वर्षाका कारण पहिरो, बाढी तथा डुबानको जोखिम रहेका क्षेत्रमा आवश्यक सतर्कता अपनाउन महाशाखाले आग्रह गरेको छ। विशेषगरी नदी तथा खोलानालाको आसपास र पहाडी क्षेत्रमा यात्रा गर्दा सावधानी अपनाउन आवश्यक देखिएको छ।