काठमाडौं । विनाशकारी बाढीबाट प्रभावित रसुवा र नुवाकोटका जलविद्युत् आयोजनाका सुरुङमा फसेका तथा सम्पर्कविहीन कामदारको खोज तथा उद्धारमा सम्बन्धित कम्पनीलाई समेत सहभागी गराउन थालिएको छ ।
यसअघि जलविद्युत् आयोजनासँग सम्बन्धित कम्पनी तथा निजी क्षेत्रका प्रतिनिधिहरूले आफ्नै प्राविधिक जनशक्ति, उपकरण तथा क्षमता हुँदाहुँदै पनि उद्धार कार्यमा सहभागी हुन सरकारले अनुमति नदिएको गुनासो गर्दै आएका थिए ।
अब भने सरकारसँगको समन्वयमा निजी क्षेत्रका प्राविधिक जनशक्ति तथा उपलब्ध प्रविधिको प्रयोग गरी खोज तथा उद्धार कार्य अघि बढाउने सहमति भएको छ ।
स्वतन्त्र ऊर्जा उत्पादकहरूको संस्था, नेपाल (इप्पान) का महासचिव टीएम आचार्यका अनुसार इप्पानले मंगलबार ऊर्जा मन्त्री विराजभक्त श्रेष्ठसँग भेट गरी बाढी प्रभावित जलविद्युत् आयोजनाको अवस्था तथा उद्धार कार्यमा निजी क्षेत्रको सहभागिताका विषयमा छलफल गरेको हो ।
छलफलपछि जलविद्युत् आयोजनाका सुरुङ तथा पावरहाउसमा फसेका र सम्पर्कविहीन कामदारको खोजीमा सम्बन्धित आयोजनाका प्राविधिक जनशक्ति, उपकरण तथा निजी क्षेत्रको विशेषज्ञता प्रयोग गर्ने वातावरण बनेको जनाइएको छ ।
बाढीपछि रसुवा र नुवाकोटका विभिन्न जलविद्युत् आयोजनाका सुरुङमा ठूलो संख्यामा कामदार तथा प्राविधिक सम्पर्कविहीन छन् । सुरुङभित्र प्रवेश गर्न कठिनाइ भइरहेका कारण पानी निकास, वैकल्पिक मार्ग निर्माण, हावा प्रवाह तथा अत्याधुनिक उपकरणको प्रयोगमार्फत खोज तथा उद्धार अघि बढाउनुपर्ने अवस्था छ ।