काठमाडौं । राष्ट्रियसभाले भोटेकोशी बाढी र त्यसपछिको व्यवस्थापनबारे विशेष प्रस्ताव सर्वसम्मतिले पारित गरेको छ ।
मंगलबार राष्ट्रियसभा अध्यक्ष नारायणप्रसाद दाहालले प्रस्तुत गरेको ‘विपद् आइसकेकाले समन्वयात्मक रूपमा राहत, उद्धार तथा विस्तृत व्यवस्थापन’ सम्बन्धी विशेष प्रस्ताव सर्वसम्मतिले पारित भएको हो ।
विशेष प्रस्तावमार्फत बाढी प्रभावित क्षेत्रमा स्वदेशी तथा विदेशी विशेषज्ञ र प्राविधिकसहितको जनशक्ति परिचालन गरी खोज तथा उद्धार कार्यलाई युद्धस्तरमा अघि बढाउन सरकारको ध्यानाकर्षण गराइएको छ ।
प्रस्तावमा बाढीमा परी ज्यान गुमाएकाहरूप्रति श्रद्धाञ्जली तथा शोकसन्तप्त परिवारजनप्रति समवेदना व्यक्त गर्दै प्रभावित नागरिकको उद्धार, राहत, पुनर्स्थापना तथा सम्पर्कविहीन व्यक्तिको खोजीलाई प्रभावकारी बनाउन आग्रह गरिएको छ ।
त्यस्तै, घाइतेहरूको निःशुल्क उपचार, वैज्ञानिक विधिबाट शव व्यवस्थापन तथा क्षतिग्रस्त भौतिक संरचनाको पुनर्निर्माणलाई प्राथमिकताका साथ अघि बढाउन सरकारलाई आग्रह गरिएको छ ।
विपद् व्यवस्थापनका लागि संघ, प्रदेश र स्थानीय तहबीच प्रभावकारी समन्वय गर्नुपर्ने प्रस्तावमा उल्लेख छ । साथै स्थानीय समुदाय, नागरिक समाज, निजी क्षेत्र, विकास साझेदार तथा अन्तर्राष्ट्रिय समुदायको सहयोग र सहकार्यमा राष्ट्रिय एकता कायम गर्दै विपद्को सामना गर्न सरकारको ध्यानाकर्षण गराइएको छ ।
भविष्यमा यस्ता विपद्बाट हुने क्षति न्यूनीकरणका लागि प्रभावकारी उपाय अवलम्बन गर्नसमेत सरकारलाई आग्रह गरिएको छ ।
यस्तो छ राष्ट्रियसभाको विशेष प्रस्ताव
‘मिति २०८३ साल भदौ १० गते रसुवाको भोटेकोशी नदीमा आएको विनाशकारी बाढीका कारण भएको जनधनको क्षतिको दुःखद् घडीमा ज्यान गुमाउने नागरिकहरूप्रति भावपूर्ण श्रद्धाञ्जली तथा शोकसन्तप्त परिवारजनप्रति गहिरो समवेदना व्यक्त गर्दै बाढी प्रभावितको उद्धार, राहत, पुनर्स्थापना तथा सम्पर्कविहीनहरूको खोजी, घाइतेहरूको निःशुल्क उपचार, वैज्ञानिक शव व्यवस्थापन र भौतिक संरचनाको पुनर्निर्माणका लागि तहगत सरकारहरूबीच समन्वय, स्थानीय समुदाय, नागरिक समाज, निजी क्षेत्र, विकास साझेदार तथा अन्तर्राष्ट्रिय समुदायलगायत सबैको सहयोग, सहकार्य र समन्वयमा राष्ट्रिय एकता कायम गरी विपद् व्यवस्थापन गर्न र भविष्यमा विपद् जोखिम न्यूनीकरण गर्न प्रभावकारी उपाय अवलम्बन गर्न नेपाल सरकारको विशेष ध्यान जाओस् भन्ने आग्रहसहित यो विशेष प्रस्ताव पारित गरियोस् ।’
– न्युज एजेन्सी नेपाल