काठमाडौं । नेपाली राष्ट्रिय बिच भलिबल महिला तथा पुरुष टोलीले भुटानमा आयोजना हुने काभा बिच भलिबल टुरमा उपाधि जित्ने लक्ष्य राखेको छ ।
भुटानको राजधानी थिम्पुमा आगामी सेप्टेम्बर ४ देखि ६ तारिखसम्म काभा बिच भलिबल टुर आयोजना हुँदैछ । प्रतियोगितामा नेपालका समान दुई–दुई महिला तथा पुरुष टोलीले प्रतिस्पर्धा गर्नेछन् ।
महिला टोलीमा अनुभवी खेलाडी कमला पुन र कोपिला रानाको जोडीले प्रतिस्पर्धा गर्नेछ । कमला पुनले यसअघि काभा बिच भलिबलमा नेपाललाई एक स्वर्ण र एक रजत पदक दिलाइसकेकी छन् ।
महिलातर्फको अर्को टोलीमा सुनिता राई र भावना डाँगी रहेका छन् । पुरुषतर्फ महेन्द्र श्रेष्ठ–राजकुमार निरौला तथा झमनसिंह दर्जी–शरण कार्कीको जोडीले नेपालको चुनौती प्रस्तुत गर्नेछन् ।
नेपाली बिच भलिबल टोलीका प्रशिक्षक श्रीराम बोगाटी रहेका छन् । काभा बिच भलिबलमा नेपालले पछिल्ला वर्षहरूमा पदक जित्दै आएको छ । यसपटक पनि नेपाली टोली स्वर्ण पदक जित्ने लक्ष्यसहित थिम्पु जाने तयारीमा छ ।
नेपाल भलिबल संघका अनुसार जितेन्द्र श्रेष्ठको नेतृत्वमा खेलाडी, प्रशिक्षक तथा व्यवस्थापनसहित १० सदस्यीय नेपाली टोली बुधबार भुटान प्रस्थान गर्नेछ ।
राष्ट्रिय खेलकुद परिषद् (राखेप) का सदस्यसचिव रामचरित मेहता तथा नेपाल भलिबल संघका अध्यक्ष जितेन्द्रबहादुर चन्दलगायतले नेपाली टोलीलाई बिदाइ गरेका छन् ।
बिदाइ कार्यक्रममा सदस्यसचिव मेहताले राष्ट्रिय टोलीमा स्थान बनाएका खेलाडीले उच्च मनोबलका साथ प्रतियोगितामा उत्कृष्ट प्रदर्शन गर्नुपर्ने बताए ।
नेपाली भलिबलको आवश्यकता तथा विद्यमान अभावबारे आफू जानकार रहेको उल्लेख गर्दै उनले स्रोतसाधनको सीमितताका कारण कतिपय लक्ष्य पूरा गर्न कठिनाइ भइरहेको बताए । उपलब्ध अवसरलाई सदुपयोग गर्दै खेलाडीले उत्कृष्ट प्रदर्शन गर्नेमा आफू विश्वस्त रहेको उनको भनाइ छ ।
नेपाल भलिबल संघका अध्यक्ष जितेन्द्रबहादुर चन्दले पाकिस्तानमा आयोजना हुने १४औँ दक्षिण एसियाली खेलकुद (साग) मा बिच भलिबल समावेश गरिएकाले नेपालले अहिलेबाटै योजनाबद्ध तयारी गर्नुपर्ने बताए । उनले दशौँ राष्ट्रिय खेलकुदमा समेत बिच भलिबल समावेश गरी तयारीको अवसर प्रदान गर्न आग्रह गरे ।
थिम्पुमा हुने काभा बिच भलिबल टुरमा नेपालसहित आयोजक भुटान, भारत, श्रीलंका, बंगलादेश, माल्दिभ्स र उज्बेकिस्तानका टोलीले प्रतिस्पर्धा गर्नेछन् ।
नेपालले पछिल्ला वर्षमा बिच भलिबलमा अन्तर्राष्ट्रिय स्तरमा उल्लेखनीय सफलता हासिल गर्दै आएको छ । २०८१ सालमा भुटानमै सम्पन्न प्रतियोगिताको फाइनलमा उज्बेकिस्तानलाई पराजित गर्दै कमला पुन र मनीषा चौधरीको जोडीले महिला बिच भलिबलको उपाधि जितेको थियो ।
त्यसअघि बंगलादेशमा भएको काभा बिच भलिबलमा कमला पुन र कोपिला उप्रेतीको जोडीले रजत पदक जितेको थियो । पुरुषतर्फ पनि नेपालले रजत पदक जितेको थियो । मानबहादुर श्रेष्ठ र दिलबहादुर सुनारको जोडीले उक्त सफलता हात पारेको थियो ।
पछिल्ला अन्तर्राष्ट्रिय सफलताले नेपाली बिच भलिबलमा सम्भावना देखिए पनि नियमित प्रशिक्षण, अन्तर्राष्ट्रिय प्रतियोगिताको अवसर तथा पूर्वाधारको अभाव अझै चुनौतीका रूपमा रहेको नेपाल भलिबल संघले जनाएको छ ।
करिब एक महिनाको प्रशिक्षणपछि स्वर्ण पदक जित्ने लक्ष्यसहित नेपाली बिच भलिबल टोली भुटान प्रस्थान गर्न लागेको हो ।
– न्युज एजेन्सी नेपाल