जलविद्युत आयोजनाको टनेलमा फसेका नागरिकको जीवनरक्षालाई प्राथमिकता दिन सरकारलाई एमालेको आग्रह

नेकपा (एमाले)का प्रमुख सचेतक ऐन महरले निर्माणाधीन जलविद्युत आयोजनाका टनेलमा फसेका नागरिकको शीघ्र उद्धार गर्न सरकारसँग आग्रह गर्नुभएको छ ।
प्रतिनिधि सभाको बिहीवारको बैठकमा बोल्दै उहाँले यस्तो आग्रह गर्नुभएको हो । उहाँले यो शोकलाई शक्तिमा बदल्न सरकारलाई निःसर्त साथ दिन आफूहरु तयार रहेको पनि बताउनुभयो । उहाँले जलविद्युत आयोजनाको टनेलमा फसेका नागरिकको जीवनरक्षालाई प्राथमिकता दिन सरकारको ध्यानाकर्षण गराउनु भयो । प्रमुख सचेतक महरले आफ्नो गृहजिल्ला बझाङका दुई जना इन्जिनियरसमेत जलविद्युत आयोजनाको टनेलमा फसेको र उनीहरूको अवस्था अझै अज्ञात रहेको जानकारी दिनुभयो ।
उहाँले भन्नुभयो, ‘हामी सबै सरकारको साथमा छौँ । हामी निसर्त सरकारलाई साथ दिन चाहन्छौँ र यो संकटको सामना गर्न चाहान्छौँ । यो शोकलाई हामी शक्तिमा बदल्न चाहन्छौँ । अहिले पनि धेरै नागरिक उद्धारको लागि गुहार गरिरहनुभएको छ । निर्माणाधीन जलविद्युत आयोजनाहरुका टनेलहरुमा फसिरहनुभएको अवस्था छ । म सरकारको ध्यानाकर्षण गराउन चाहन्छु उहाँहरुको छिटोभन्दा छिटो उद्धार गरियोस् । मेरो गृहजिल्ला बझाङका दुई जना इन्जिनियरहरु समेत यो आयोजनामा फसेका छन् । उहाँहरुको अवस्था अझै पनि अज्ञात रहेको छ । उनीहरुको खोजिमा समेत सरकारले ध्यान देओस् ।’
उहाँल बाढी प्रभावित क्षेत्रका नागरिकको स्वास्थ्यप्रति समेत सरकार गम्भीर हुनुपर्ने बतनउनु भयो ।