अफगानिस्तानको सुरक्षा बलले विगत १२ महिनामा देशभर सञ्चालन गरेका विभिन्न कारबाहीका क्रममा २ हजार ८५८ थान साना तथा ठूला हतियार र ठूलो परिमाणमा गोलाबारुद बरामद गरेको छ । सरकारी प्रवक्ता जबिहुल्लाह मुजाहिदले यसबारे औपचारिक जानकारी दिनुभएको हो ।
देशभर सञ्चालन गरिएका विशेष अपरेसनको नतिजा सार्वजनिक गर्दै प्रवक्ता मुजाहिदले सुरक्षा फौजले २ हजार ८५८ थान विभिन्न प्रकारका हतियार, २५ हजार ८५४ राउन्ड गोलाबारुद, १६९ वटा विभिन्न प्रकृतिका विद्युतीय धराप (माइन), सातवटा सञ्चार उपकरण र १० थान सैन्य सामग्री नियन्त्रणमा लिएको बताउनुभयो ।
यसैगरी, हतियार तथा उपकरण ओसारपसारमा संलग्न रहेको आशङ्कामा ८०४ जना संदिग्ध व्यक्तिलाई नियन्त्रणमा लिइएको छ । सुरक्षा अधिकारीहरूले सोही अवधिमा २३२ वटा चारपाङ्ग्रे सवारीसाधन र २६ वटा मोटरसाइकलसमेत जफत गरेका छन् ।
जफत गरिएका सवारीसाधनमध्ये केही सैन्य प्रयोजनका रहेको र ती विभिन्न कारबाहीका क्रममा बरामद गरिएको प्रवक्ता मुजाहिदले उल्लेख गर्नुभयो ।