धनकुटा । धनकुटाको साँगुरीगढी गाउँपालिका–७ फेदीबाट प्रहरीले १ हजार २४० किलो ६ सय ग्राम लागूऔषध गाँजासहित ट्रक बरामद गरेको छ।
बुधबार राति करिब ११ बजे कोशी लोकमार्गअन्तर्गत मुलघाटबाट खटिएको नेपाल प्रहरी र सशस्त्र प्रहरीको संयुक्त चेकिङ टोलीले धनकुटाबाट भेडेटारतर्फ जाँदै गरेको ना.४ ख ५२७ नम्बरको ट्रकलाई चेकजाँचका लागि रोक्न खोजेको थियो।
प्रहरीका अनुसार ट्रक रोक्ने क्रममा चालक ट्रकबाट हाम फालेर फरार भएका थिए। ट्रक शंकास्पद देखिएपछि चेकजाँच गर्दा भित्र लुकाएर राखिएको अवस्थामा ठूलो परिमाणमा गाँजा फेला परेको हो।
प्रहरीले फरार चालकको खोजी गरिरहेको जनाएको छ। घटनाबारे थप अनुसन्धान भइरहेको छ।