काठमाडौं । ललितपुरको सातदोबाटोस्थित पौडी पोखरी परिसरमा जेनजी सहिदको सालिक अनावरण गर्ने कार्यक्रम स्थगित भएको छ।
पौडी पोखरी परिसरभित्रको जेनजी स्मृति पार्कमा निर्माण गरिएको सहिदहरूको सालिक वास्तविक व्यक्तिको अनुहारसँग नमिलेको भन्दै परिवारजनले आपत्ति जनाएपछि अनावरण कार्यक्रम स्थगित गरिएको हो।
सालिक अनावरणका लागि गृहमन्त्री सुधन गुरुङ, रास्वपा सांसदहरू तथा सहिद परिवारलगायत सातदोबाटोस्थित पौडी पोखरी परिसर पुगेका थिए।
सो क्रममा सहिद परिवारहरूले सालिकको अनुहार वास्तविक व्यक्तिसँग नमिलेको भन्दै आपत्ति जनाएका थिए। त्यसपछि सालिक अनावरण कार्यक्रम रोकिएको रास्वपा सांसद जगदीश खरेलले जानकारी दिए।
निर्माण गरिएको सालिकको अनुहार सम्बन्धित सहिदसँग नमिलेको भन्दै परिवारजन तथा आफन्तबाट असहमति आएपछि तत्काल हतारमा अनावरण नगर्ने निर्णय गरिएको उनले बताए।