काठमाडौं । सत्तारुढ दल राष्ट्रिय स्वतन्त्र पार्टी (रास्वपा)की सांसद विदुषी राणाले हिमाल तथा हिमनदीको निगरानी, सीमापार पूर्वसूचना प्रणाली तथा जलवायु अनुकूलनका संरचना निर्माणलाई राष्ट्रिय प्राथमिकता बनाउन सरकारसँग माग गरेकी छन्।
प्रतिनिधि सभाको बुधवारको बैठकमा बोल्दै उनले विश्वव्यापी जलवायु परिवर्तनका कारण हिमनदी पग्लिने क्रम तीव्र बन्दै गएको भन्दै हिमनदी र हिमालको संरक्षण तथा निगरानीलाई प्राथमिकता दिनुपर्नेमा जोड दिइन्।
रसुवाको भोटेकोशीमा आएको बाढी विपद्को एउटा घटना मात्र नभई हिमालयले दिएको चेतावनी भएको उनले बताइन्। वैज्ञानिक अध्ययनअनुसार हिन्दुकुश हिमालयमा सन् २००० यता हिमनदी पग्लिने गति झन्डै दोब्बर भएको र हालकै उत्सर्जनको क्रम जारी रहे यस शताब्दीको अन्त्यसम्म हिमनदीको आयतन ८० प्रतिशतसम्म गुम्न सक्ने चेतावनी दिइन्।
उनले भनिन्, ‘रसुवाको विनाशकारी बाढी केवल एउटा दुर्घटना होइन। यो हिमालयले हामीलाई दिएको एउटा चेतावनी हो। सभामुख महोदय, वैज्ञानिक अध्ययनले हिन्दुकुश हिमालयमा सन् २००० यता हिमनदी पग्लिने गति झन्डै दोब्बर भएको र अहिलेको उत्सर्जनको क्रम जारी रहे यस शताब्दीको अन्त्यसम्म हिमनदीको आयतन ८० प्रतिशतसम्म गुम्न सक्ने चेतावनी दिएको छ।’
‘तर विडम्बना, विश्वको ग्रीनहाउस ग्यास उत्सर्जनमा नेपालको योगदान ० दशमलव १ प्रतिशत मात्रै छ। तर त्यसको मूल्य हामी जीवन, बस्ती र पूर्वाधारबाट तिरिरहेका छौँ। त्यसकारण हिमनदी र हिमालहरूको रियल टाइम मोनिटरिङ, क्रस बोर्डर अर्ली वार्निङ सिस्टम र जलवायु अनुकूलन संरचना निर्माणलाई राष्ट्रिय प्राथमिकता बनाऔँ,’ उनले भनिन्।
सांसद राणाले सरकारले जलवायु न्यायका लागि कूटनीतिक पहल गर्नुपर्नेमा समेत जोड दिइन्।
–न्युज एजेन्सी नेपाल