काठमाडौं । सत्तारुढ दल राष्ट्रिय स्वतन्त्र पार्टी (रास्वपा)की सांसद एवं जेन–जी शहीदकी आमा रचना खतिवडाले शहीदहरूले कहिले न्याय पाउँछन् भन्दै सरकारसँग प्रश्न गरेकी छन्।
प्रतिनिधि सभाको बुधवारको बैठकमा बोल्दै उनले जेन–जी शहीदको स्मृतिमा मंगलबार राजधानीमा आयोजित कार्यक्रममा प्रधानमन्त्री बालेन्द्र साह उपस्थित नभएको भन्दै असन्तुष्टि जनाइन्।
जेन–जी शहीदका बारेमा बोलिदिन आग्रह गर्दा एक वर्षपछि श्रद्धाञ्जली आएको उल्लेख गर्दै उनले शहीदहरूले न्याय कति वर्षमा पाउँछन् भन्दै प्रश्न गरिन्।
उनले भनिन्, ‘देशले शहीद पायो, एक दिन बिदा पनि पायो। स्मृति दिवसमा आएर केही बोलिदिनुहोस्, जेन–जी शहीदका लागि केही लेखिदिनुहोस् भनेर बिहान ७ बजेदेखि भन्दा–भन्दै साँझ ७ बजे स्टाटस त आयो। अन्तमा एक वर्षपछि शहीदलाई श्रद्धाञ्जली। अब म यो सरकारलाई दुईवटा प्रश्न सोध्न चाहन्छु। शहीदले न्याय कति वर्षपछि पाउँछ सरकार ? शहीद परिवार र घाइते परिवारलाई भेट्न कति वर्ष लाग्छ अब ?’
सांसद खतिवडाले जेन–जी आन्दोलनका शहीद परिवार र घाइतेका माग सम्बोधन गर्नसमेत सरकारसँग माग गरिन्।
–न्युज एजेन्सी नेपाल