काठमाडौं । नेकपा (एमाले) की सांसद एशुदाकुमारी बरालले सत्तारुढ दल रास्वपाकै कार्यकर्ताबाट आफूलाई बलात्कार गर्ने र ज्यान मार्ने धम्की आइरहेको भन्दै सरकारको ध्यानाकर्षण गराएकी छिन्।
प्रतिनिधि सभाको शुक्रवारको बैठकमा बोल्दै उनले यस्तो ध्यानाकर्षण गराएकी हुन्। उनले रसुवा बाढीपीडितको छिटो उद्धार गर्न माग गरेकै भरमा आफू साइबर बुलिङमा परेको बताएकी छिन्। उनले महिलामाथि गालीगलौज गर्ने र धम्की दिने कार्यमा संलग्नलाई छिटोभन्दा छिटो कारबाही गर्न पनि सरकारको ध्यानाकर्षण गराएकी छिन्। सांसद बरालले बाढीपीडित महिला, सुत्केरी र अन्य पीडितले भोगिरहेको समस्याप्रति पनि सरकार गम्भीर बन्नुपर्ने बताएकी छिन्। सडकमै महिला सुत्केरी हुनुपर्ने र ग्यास नपाएकै कारण खोलामा हाम फाल्नुपर्ने अवस्था रहेको भन्दै उनले सरकारको यस्तै नीति हो र ? भन्दै प्रश्न पनि गरेकी छिन्।
उनले भनिन्, ‘सम्माननीय सभामुख महोदय, म कसरी सम्मन गरौँ ? सडकमा महिला सुत्केरी, सुत्केरी महिलालाई खाना नपाएर हाम फाल्नु, शरिरमा आगो लगाउनु सरकारको नीति हो र ? सम्माननीय सभामुखमार्फत म सरकारको ध्यानाकर्षण गराउन चाहान्छु, साइबर बुलिङ किन यस्तो समयमा ? अरुको उदाहरण छैन, मलाई नै बलात्कार गरेर मारिदिन्छु भन्ने म्यासेज हजारौँ छन्। सरकार उद्धार छिटो हुनुपर्छ भनेकै कारण साइबर बुलिङको सिकार हुनुपर्ने ? महिलामाथि गाली गलौज गर्नेलाई कारबाही गर सरकार, हैन भने हिजो तिमीहरुले नै सिकाएको कुराहरु हो, आज अन्त्य गर्नुपर्छ। घण्टीको फोटो राखेर गाली गलौज गर्ने कार्य भइरहेको छ, सरकारको ध्यानाकर्षण होस्।’
सांसद बरालले सामाजिक सञ्जालमा ‘घण्टी’ को फोटो राखेर गालीगलौज गर्ने गतिविधि भइरहेको भन्दै त्यस्ता गतिविधि नियन्त्रण गर्न सरकारको ध्यानाकर्षण गराएकी छिन्।