काठमाडौं । काठमाडौं महानगरपालिकाले वर्षाका बेला देखिने सहरी बाढीको जोखिम न्यूनीकरण गर्न ‘रिचार्ज काठमाडौं’ अभियान अघि बढाउने भएको छ।
महानगरका अनुसार अभियानको मुख्य उद्देश्य वर्षाको पानीलाई व्यवस्थित रूपमा संकलन गरी जमिनमा पुनर्भरण गर्नु हो। यसबाट पानीको उचित व्यवस्थापनसँगै सहरी क्षेत्रमा बढ्दै गएको ‘अर्बन फ्ल्यास फ्लड’को जोखिम कम गर्ने लक्ष्य राखिएको छ।
काठमाडौं महानगर प्रहरी बलको ३४औँ वार्षिकोत्सव कार्यक्रममा कार्यवाहक प्रमुख सुनिता डंगोलले पछिल्लो समय सामान्य वर्षामै पनि काठमाडौंका विभिन्न क्षेत्रमा बाढी आउने अवस्था देखिन थालेकाले यसको दीर्घकालीन समाधान खोज्न आवश्यक रहेको बताइन्।
उनका अनुसार विगतमा सहरी क्षेत्रमा योजनाविहीन रूपमा भएका विकास निर्माण र संरचनाका कारण वर्षाको पानी प्राकृतिक रूपमा व्यवस्थापन हुने प्रणालीमा असर परेको छ। यसको परिणामस्वरूप पछिल्ला वर्षमा सामान्य वर्षामै पनि सहरी बाढीको समस्या देखिन थालेको उनको भनाइ छ।
डंगोलले काठमाडौंमा वर्षा हुनासाथ नगर प्रहरी, विपद् व्यवस्थापन टोली तथा जनप्रतिनिधिलाई सम्भावित जोखिमका कारण तयारी अवस्थामा रहनुपर्ने अवस्था आएको बताइन्।
महानगरले सहरी बाढीको दीर्घकालीन समाधानका लागि अध्ययनसमेत अघि बढाइरहेको छ। तर अध्ययनको निष्कर्ष आउनुअघि नै गर्न सकिने व्यावहारिक काम सुरु गर्ने उद्देश्यले ‘रिचार्ज काठमाडौं’ अभियान अघि सारिएको उनले जानकारी दिइन्।
अभियानअन्तर्गत वर्षाको पानी संकलन, जमिनभित्र पानी पुनर्भरण तथा पानीको व्यवस्थित व्यवस्थापनलाई प्राथमिकतामा राखिने महानगरले जनाएको छ।
महानगरले तत्काल कार्यान्वयन गर्न सकिने उपायबाट काम सुरु गर्दै काठमाडौंलाई बाढीको जोखिमबाट सुरक्षित, व्यवस्थित र दिगो सहरका रूपमा विकास गर्ने लक्ष्य लिएको छ।