नयाँ दिल्ली । भारतीय प्रधानमन्त्री नरेन्द्र मोदीले ग्लोबल साउथका देशहरूमा ब्रिक्सप्रति विश्वास थप बढ्दै गएको बताएका छन्।
नयाँ दिल्लीमा जारी ब्रिक्स शिखर सम्मेलनलाई सम्बोधन गर्दै मोदीले ब्रिक्समा विकासशील राष्ट्रहरूको आवाजलाई महत्व दिइने र उनीहरूका अनुभव तथा आवश्यकताका आधारमा समाधान खोजिने भएकाले संगठनप्रतिको विश्वास बढेको बताएका हुन्।
मोदीले ब्रिक्सको वास्तविक शक्ति सदस्य राष्ट्रहरूको विविधता र आपसी सहकार्यमा रहेको उल्लेख गरे। फरक–फरक परिस्थिति र अनुभव भए पनि सहकार्यका माध्यमबाट साझा प्रगति हासिल गर्न सकिने उनको भनाइ छ।
उनले ब्रिक्स स्टार्टअप इनोभेसन फन्डमार्फत नयाँ तथा विस्तार गर्न सकिने प्रविधि र समाधानलाई प्रोत्साहन गर्ने योजना रहेको जानकारी दिए।
कृषिमा एआई र जियोस्पेसियल प्रविधिको प्रयोग
मोदीले ब्रिक्स डिजिटल एग्रिकल्चर नेटवर्कमार्फत कृषिमा आधुनिक प्रविधिको प्रयोग बढाउने प्रस्ताव अघि सारेका छन्। उनका अनुसार किसानका आवश्यकता पहिचान र समाधानका लागि कृत्रिम बौद्धिकता (एआई), जियोस्पेसियल प्रविधि तथा डिजिटल सार्वजनिक पूर्वाधारको उपयोग गरिनेछ।
प्रविधि र महत्वपूर्ण खनिजलाई रणनीतिक रूपमा नियन्त्रण गर्ने प्रवृत्तिले विश्वव्यापी विकासमा अवरोध सिर्जना गर्न सक्ने भन्दै मोदीले प्रविधिको पहुँच सबैका लागि समान र समावेशी हुनुपर्नेमा जोड दिए।
उनले ब्रिक्सबीचको सहकार्यले सदस्य राष्ट्र मात्र नभई समग्र मानवताको हितमा योगदान पुर्याउनुपर्ने धारणा समेत राखे।