२९ भदौ, काठमाडौं । भोटेकोशी बाढीबाट प्रभावित रसुवा र नुवाकोटका नागरिकलाई सहयोग पुर्याउन गैरआवासीय नेपाली संघ (एनआरएनए)ले सञ्चालन गरेको राहत अभियानलाई निरन्तरता दिएको छ।
राहत अभियानअन्तर्गत एनआरएनएले रसुवाको गोसाइँकुण्ड गाउँपालिका–१ मा बाढी तथा पहिरोबाट प्रभावित परिवारका लागि खाद्यान्नसहित आवश्यक राहत सामग्री उपलब्ध गराएको छ। उक्त सामग्री वडा अध्यक्ष उर्गेन छिरिङ लामालाई हस्तान्तरण गरिएको हो। बेलायतको लिभरपुलमा रहेको लिभरपुल नेपाली समाजले राहत सामग्रीका लागि आर्थिक सहयोग गरेको एनआरएनएले जनाएको छ। स्थानीय तहले प्रभावित परिवारको आवश्यकता पहिचान गरी सामग्री वितरण गर्नेछ।
त्यस्तै, नुवाकोटको विदुर नगरपालिका–७, तुप्चेमा रहेका १८ प्रभावित परिवारलाई खाना पकाउन आवश्यक सामग्री वितरण गरिएको छ। प्रत्येक परिवारलाई एक थान ग्यास सिलिन्डर, ग्यास चुलो र प्रेसर कुकर प्रदान गरिएको हो। विदेशमा रहेका एनआरएनएका पञ्जीकृत सदस्यका परिवारलाई लक्षित गर्दै संघका उपाध्यक्षद्वय मनोज गोर्खाली र तिलक गैरेको पहल तथा प्रयोजनमा उक्त सहयोग उपलब्ध गराइएको जनाइएको छ।
यसै क्रममा एनआरएनएका पदाधिकारी सम्मिलित राहत टोलीले रसुवाको स्याफ्रुबेँसी, चिलिमे हाइड्रोपावर आसपास तथा बेत्रावती क्षेत्रको स्थलगत निरीक्षणसमेत गरेको छ। टोलीले बाढी तथा पहिरोबाट पुगेको क्षति, प्रभावित परिवारको वर्तमान अवस्था र उनीहरूलाई तत्काल आवश्यक पर्ने सहयोगबारे स्थानीयस्तरमा जानकारी संकलन गरेको थियो।
स्थलगत भ्रमणका क्रममा विपद्मा परी ज्यान गुमाएकाहरूको सम्झनामा मौनधारण गर्दै श्रद्धाञ्जली व्यक्त गरिएको थियो। साथै प्रभावित परिवारप्रति समवेदना प्रकट गरिएको एनआरएनएले जनाएको छ।
स्थानीय जनप्रतिनिधि तथा प्रभावित नागरिकसँगको छलफलबाट प्राप्त विवरणका आधारमा आगामी दिनमा राहत, पुनर्स्थापना तथा आवश्यक सहयोगका कार्यक्रमलाई अझ व्यवस्थित र प्रभावकारी बनाउने संघले जनाएको छ।