नेकपा (एमाले) संसदीय दलकी उपनेता पद्माकुमारी अर्यालले विपद्पछिको राहत, खोज तथा उद्धार, पुनस्र्थापना र पुनर्निर्माणको कामलाई प्रभावकारी बनाउन संसदीय विशेष समिति गठन गर्न सरकारको ध्यानाकर्षण गराएकी छन् ।
प्रतिनिधि सभाको मंगलवारको बैठकमा बोल्दै उहाँले यस्तो माग गरेकी हुन् । उहाँले बाढीपीडितका लागि राहत संकलन भएपनि रसुवाका विभिन्न क्षेत्रमा पर्याप्त राहत पुग्न नसकेको जनगुनासो आएको भन्दै प्रभावित क्षेत्रमा तत्काल राहत पुर्याउन माग गरिन् । उहाँले बेपत्ता नागरिकको खोजीमा ढिलाइ, राहत वितरणमा विभेद र पुनस्र्थापनाको तयारी समेत नभएको भन्दै सरकारको आलोचना पनि गरिन् । उहाँले सरकारले आफ्नो सामथ्र्यको समयमै आँकलन गर्न नसक्दा ठूलो क्षति भएको पनि बताइन् । उहाँले विश्वविद्यालय तथा क्याम्पसका इन्जिनियर र विभिन्न क्षेत्रका विज्ञलाई परिचालन गर्न नगरेको तथा सर्वदलीय बैठकमार्फत राजनीतिक दलहरूसँग समन्वय र सहकार्य गर्ने कार्यमा समेत सरकार चुकेको टिप्पणी गरिन् ।
उहाँले भनिन्, ‘आजका दिनमा पनि रसुवाका विभिन्न क्षेत्रमा पर्याप्त राहत पुग्न नसकेको जनगुनासो आइरहेको छ । पीडितका निम्ति राहत जम्मा भएकै छ । जुनसुकै उपाय अवलम्बन गरेर भए पनि ती ठाउँमा पर्याप्त राहत पुर्याउने तत्काल व्यवस्था गरियोस् । सत्तारूढ दलका सभापतिज्यूले पनि यही रोस्टममा व्यक्त गर्नुभएको छ, म त्यसलाई पनि समर्थन गर्छु र हाम्रो पनि यो जोरदार कुरा राख्न चाहन्छु । राहत, खोज, उद्धार, पुनःस्थापना, पुनर्निर्माणका काममा थप प्रभावकारी बनाउन सहयोग पुग्ने गरी संसदीय विशेष समिति गठन गरियोस् । विपद् प्राकृतिक भएपनि विपद्पछि हुने मृत्यु, बेपत्ता नागरिकको खोजीमा हुने ढिलाइ, राहतमा हुने विभेद र पुनःस्थापनामा हुने ढिलाइ सबै प्राकृतिक विपत्ति होइनन् । यो राज्यको तयारी क्षमता र जवाफदेहितासँग जोडिएका प्रश्न हुन् ।’
उहाँले तत्काल पुनर्निमाण प्राधिकरण गठन गर्न समेत सरकारसँग माग गरिन् ।